भांगरभूंय | प्रतिनिधी
गोमंतक भोवजन महासंघाची शिटकावणी
पणजीः गोमंतक भोवजन महासंघान गोविंद गावडे हांकां तेंको जाहीर केला. फकत ‘गोविंद गावडे’ ह्या नांवाचेर कांय जाण राजकारण करतात. भोवजन समाजा कडल्यान नेतृत्व काडून घेवपाचो हो यत्न कांय जाणांनी चलयला. जर गावडे हांचें कसलेंच लुकसाण जालें, जाल्यार तें आमी मात्तूय सोंसून घेवचे नात, अशी शिटकावणी गोमन्तक भोवजन महासंघान दिल्या. मंत्री गावडे हांकां समर्थन जाहीर करपाक पणजे गोमंतक भोवजन महासंघान पत्रकार परिशद घेतली.
ह्या वेळार उलयतना महासंघाचे फुडारी विजय केळुस्कार हांणी सांगलें, गोविंद गावडे हांणी प्रेरणा दिसा निमतान केल्ल्या वक्तव्याचेर, उपरांतचे घडामोडीचेर कांय लोक नाका जाल्ले आरोप करपाक लागल्यात. खरें पळोवपाक गेल्यार तें वक्तव्य तांच्या समाजा पुरतेंच आशिल्लें. देखून त्या वक्तव्याचेर राजकारण करपाची गरज नाशिल्ली.
महासंघाची माची एकठांय हाडपाक गोविंद गावडे हांचो मोलाचो वाटो आसा. फाटलीं कितलींशींच वर्सां फकत मंत्री आसतनाच न्हय ‘उटा’ खातीर सामान्य मनीस म्हण वावुरतना गावडे हे एसटी समाजा पुरते रावले नात. ते भोवजन महासंघा फाटल्यान उबे रावले. देखून आमी तांचें समर्थन करतात. आमच्यो ज्यो कागाळी आमी तांचे मुखार मांडटात आनी ते मुख्यमंत्र्या मुखार घेवन सरकारा कडेन फाटपुरवण करतात, अशें केळुस्कार हांणी म्हणलें.
मेजकेच लोक आसात जे तांचे आड राजकारण करतात. खंयतरी भोवजनाचें नेतृत्व काडून घेवपाचो हो यत्न चल्ला. गोंयची उण्यात उणी ६०- ७० टक्के जनता आनी २४ जाती भोवजन महासंघा खाला येता. आमी सगळे तांचे फाटल्यान खंबीर उबे आसात. गोविंद गावडे हांकां खंयतरी लुकसाण जातलें अशें कोणेच चितचें न्हय आनी आमी हें मात पसून सोंसून घेवचे नात, अशी शिटकावणी केळुस्कार हांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
