भांगरभूंय | प्रतिनिधी
रातचीं 7 ते सकाळीं 6 मेरेनचो वेळ
पणजी : गोंयांतल्या सगल्या कारखान्यांनी बायलांक आतां रातपाळयेक कामाक दवरपाची मेकळीक वेवस्थापनाक आसतली. रातचीं 7 ते सकाळीं 6 मेरेन बायलांक आतां रातपाळचे ड्युटेयर दवरपाक हरकत ना. हाचे खातीर कांय अटींक पालव दिवचो पडटलो. कारखानो कायदो 1948च्या कलम 66 मदीं आशिल्ल्या नेमांत कारखानो आनी बाश्पक खात्यान फावो ते बदल केल्यात.
रातचीं 7 ते सकाळीं 6 मेरेन बायलांक कामाक दवरचे पयली संबंदीत बायलां कामगारा कडल्यान तिची लेखी मान्यताय घेवची पडटली. बायलां कामगाराची मान्यताय नासली जाल्यार त्या बायल कामगाराक रातची ड्युटी दिवपाक मेळची ना.
घरा कडल्यान कारखान्यांत आनी काम सोंपले उपरांत कारखान्यांतल्यान घरा पावोवपा खातीर सुरक्षीत येरादारीची वेवस्था करची पडटली. ही वेवस्था केले बगर बायल कामगाराक रातची ड्युटी दिवपाक मेळची ना.
बायल कामगार काम करता ते सुवातेर सीसीटीव्ही कॅमेऱ्यांची वेवस्था करची पडटली.
रातच्या कामाक लागून बायल कामगारांक समस्या जाणवची ना, अशे तरेची वेवस्था आनी वातावरण कामाचे सुवातेर आसप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
