भांगरभूंय | प्रतिनिधी
कोयर वेवस्थापन महामंडळाची म्हायती
पणजीः गोंयांतल्या 8 डंप कोयराचे राशी पासत मुक्त जाल्यात. ह्या डंपानी कितलींशींच वर्सां पडून आशिल्ल्या कोयराच्या दोंगराचो गोंय कोयर वेवस्थापन म्हामंडळान विलो लावपाक सुरवात केल्या आनी 31 मे मेरेन हे दोंगर काबार करतले. फक्त 2 कोयराच्या डंपांतल्या राशीचो विलो लावपाचें काम चालू आसा. आतां मेरेन 5.57 लाख क्युबीक मिटर कोयराचो म्हामंडळान विलो लायला अशी म्हायती म्हामंडळाच्या अधिकाऱ्यान दिली.
गोंयांतल्या 10 डंपांत पडून आशिल्लो कोयराचो विलो लावपाचें काम दोन पांवड्यांनी हातांत घेतिल्लें. वर्स 2019 सावन हातांत घेतिल्लें हें कोयर विलो लावपाचें काम 31 मे मेरेन साेंपोवपाचें लक्ष म्हामंडळान दवरला. ह्या सगल्या 10 डंपांत आतां मेरेन 5.57 लाख इतल्या कोयराचेर प्रक्रिया करून 2.51 लाख इतलो आरडीएफ आनी 2.36 लाख इतलो कम्पोस्ट तयार करून विलो लायलाे.
पयलो पांवडो 2019 ते 2024 मजगतीं सुरू करून 10 डंपातल्या कोयराचो विलो लावपाचें काम हातांत घेतिल्लें. तातूंत सोनसडो, म्हापशें, कांपाल, इडीसी पट्टो, दिवजा सर्कल, पेडणें, दिवचल, काणकोण, कुंकळ्ळी आनी मुरगांव-सडाे ह्या डंपाचो आस्पाव आशिल्लो. ह्या डंपांतलो 4.52 लाख क्युबीक मिटर कोयराचेर प्रक्रीया करून तातुंतले 1.95 लाख क्युबीक मीटर हो आरडीएफ आनी 2.06 लाख क्युबीक मिटर कंम्पोस्ट तयार करून ताचो विलो लायला.
वर्स 2023सात 7 डंपांतल्या कोयराचो विलो लावपा खातीर दुसरो पांवडो चालीक लायलो. हातूंत काकोडें, आसगांव, पेडणें, हेडलॅण्ड-सडा, ताळगांव, सोनसडो आनी कुडका डंपांचो आस्पाव आशिल्लो. फक्त ताळगांव आनी कुडका सोडल्यार हेर वाठारांतल्या डंपांतलो 1.04 लाख क्युबीक मिटर कोयराचेर प्रक्रिया करून तातूंतलो 55,994 क्युबीक मिटर आरडीएफ आनी 35,887 क्युबीक मिटर कंम्पोस्ट तयार करून ताचो विलो लायला.
फक्त ताळगांव आनी कुडका डंपांनी पडून आशिल्ल्या कोयराचो विलो लावपाचें काम अजूनय उरलां. गोंयांतल्या सगल्या 10 डंपांतल्या कोयराचो विलो लावपा खातीर 15 फेब्रुवारी 2025 ही डेडलायन दवरिल्ली. पूण ताळगांव आनी कुडका डंपाचे प्रक्रियेक लागून ही डेडलायन आतां 31 मे 2025 मेरेन वाडयल्या. कुडका आनी ताळगांव डंपांत खणीचो आस्पाव आसा आनी पावसाक लागून कोयर हे खणीत गेल्ल्यान आमकां ह्या कोयराची प्रक्रिया करपाक कळाव जाला. देखून ही डेडलायन फुडे धुकल्ल्या. 31 मे मेरेन गोंयचे सगले डंप कोयराचे राशी पासत मुक्त जावये, असो विस्वास अधिकाऱ्यान उक्तायलाे.
कोयराची प्रक्रिया केले उपरांत जो आरडीएफ उरता तो समिटाचे फॅक्टरींक धाडटात आनी जो कंम्पोस्ट उरता ताचो वापर साऱ्या खातीर करतात. फक्त पेडणें, दिवचल, कुंकळ्ळी, काणकोण आनी सड्यार प्रक्रिया करून दवरिल्लो आरडीएफ तसोच आसा आनी हेर उरिल्लो डंपातलो आरडीएफ शिमिटाचे फॅक्टरीत व्हेला. हो आरडीएफ हातळपा खातीर कंत्राटदारान निश्काळजीपणा दाखयिल्ल्यान तांचे कंत्राट रद्द केलां आनी आरडीएफ व्हरपा खातीर नवें कंत्राट आमी काडपाचे आसात अशी म्हायती अधिकाऱ्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
