भांगरभूंय | प्रतिनिधी
राजनाथ सिंह : रुपा ए. आनी दिलना के. हांची नावीक सागर परिक्रमा
भांगरभूंय । प्रतिनिधी
वास्को : सैमाचेर जैत मेळोवप शक्य ना, पूण सैम समजून घेवपाक जाय, अशें संरक्षण मंत्री राजनाथ सिंह हांणी सांगलें.
भारतीय नौदळाच्यो लेफ्टनंट कमांडर रपा ए. आनी लेफ्टनंट कमांडर दिलना के. ह्या दोन महिला तारिणी हे शिडयेचे बोटीन सागर परिक्रमा पुराय करून आठ म्हयन्यांनी गोंयांत आयल्यो. तांच्या येवकारा खातीर बिरेस्तारा 29 मेक मुरगांव बंदरांत आयोजीत केल्ले कार्यावळींत राजनाथ सिंग हांणी खास उपस्थिती लायिल्ली. रुपा ए. आनी दिलना के. मुरगांव बंदरांत पावताच नौदळाच्या हॅलिकॉप्टरांनी तशेंच शिडयेच्या बोटींनी येवकार दिवन तांकां धक्यार हाडलीं. थंय राजनाथ सिंह आनी नौदळ मुखेल अॅडमिरल दिनेश त्रिपाठी आनी हेर नौदळ अधिकाऱ्यांनी तांकां येवकार दिलो.
नावीक सादर परिक्रमा दोन ही आठ म्हयन्यांनी पुराय करतना जी व्हड कामगिरी केल्या, ते कामगिरीचो देशवासीयांक व्हड अभिमान आसा. हो एक इतिहासीक दीस. आठ म्हयने एकसुरपणान सारतना मानसीक आनी शारिरीक समस्यांक जो फुडो केला, ती मनशां खातीर एक देख आसतली. ऑपरेशन सिंदूरचे फाटभुंयेर ह्या दोगींनी देशाचो सन्मान वाडयला. तुमी तुमच्या परिक्रमांत सैम समजून घेतलो. हे दरेकल्याक शक्य ना. जाचेर देवाची कृपा आसता, तांकांच हो मान मेळटा, अशें सिंह हांणी सांगलें.
सिंह हांणी त्या दोगींक परबीं दितना आमकां तुमचो अभिमान आसा, अशें परतून परतून सांगलें. लोकांच्या काळजांत तुमी सुवात मेळयल्या. नावीक सागर परिक्रमा वेळार आयिल्ल्या दरेका खिणाचें लेखन करात, जे वरवीं फुडली पिळगी प्रेरीत जातली. तुमचे कामगिरीन आनीक एके कामगिरीची भर पडल्या. तुमी देशाचो सन्मान वाडयला. ताचे खातीर आपले कडेन उतरां नात, फक्त भावना आसात, अशें सिंह हांणी सांगलें.
अॅडमिरल दिनेश त्रिपाठी हांणी सांगलें, आयचो दीस देशा खातीर आनी नौदळा खातीर प्रेरणा दीस आसा. ह्या दोगींनी साहस, संकल्प आनी इत्साशक्तीचें रूप दाखयलां. कांय कडेन निर्जन आशिल्ल्या दर्यांतल्यान प्रवास करून तांणी एक विक्रम रचला. तांचे कामगिरींतल्यान तरणाट्या चल्या – चलयांक प्रेरणा मेळटली हातूंत दुबाव ना. हय, आमी तें साध्य आनी सिद्ध केलें अश्या उतरांनी रुपा ए. आनी दिलना के. हांणी आपलें मनोगत उक्तायलें. आशा आनी धैर्य ह्या नेटाचेर आमी ही कामगिरी केली. दर्यांत आमी राष्ट्रध्वज, नौदळाचो ध्वज झेतान हुबयलो. खंयच्याच आव्हानाक अंत आसना. आमी दर्यांद दरेके गजालीक फुडो करून भारतीय बायल कितें करपाक शकता, तें दाखयलें. हाचे पसून हेरांक निश्चीत प्रेरणा मेळटली, अशें तांणी सांगलें.
8 म्हयन्यांत सुमार 23,400 सागरी मैल प्रवास
2 ऑक्टोबर 2024 ह्या दिसा अॅडमिरल दिनेश त्रिपाठी हांणी गोंयांत बावटो दाखयले परांत सुरू जाल्ली ही नावीक सागरी परिक्रमा दोनांत रुपा ए. आनी दिलना के. हांणी आठ म्हयन्यांत सुमार 23,400 सागरी मैला परस चड अंतर हुपलें. तांणी मेक इन इंडिया आनी आत्मनिर्भर भारत उपक्रमांचें एक प्रतीक आशिल्ले तारिणी बोटींतल्यान ही परिक्रमा पुराय केली. तांच्या प्रवासांत तांकां दर्याचीं ल्हारां, सामकें उणें तापमान, वादळी हवामान, प्रवासांत वराक 93 किलोमिटर गतीन सुटिल्लो वारो, सात मिटर उंचायेचीं ल्हारां हांकां फुडो करचो पडिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
