भांगरभूंय | प्रतिनिधी
गरमी सोंपिल्ल्याचें दामू नायक हांचें सुचक विधान
उलोवपाक मुख्यमंत्र्याचो न्हयकार दिल्ल्यान ‘सस्पेन्स’
गोविंद गावडे हांचें लेगीत मंत्रीपदाचेर मौन
भांगरभूंय । प्रतिनिधी
पणजी : आदिवासी खात्याच्या कारभाराचेर जाहीर टिका केल्ल्यान वाद निर्माण जाल्ले वादाचे फाटभुंयेर गरमी सोंपिल्ल्यान आतां मंत्रीमंडळ फेरबदल जावप शक्य आसा, अशें सूचक विधान प्रदेश भाजप अध्यक्ष दामू नायक हांणी केलां. मंत्री गोविंद गावडे हांचे कडेन चर्चा केल्या उपरांत फुडलो निर्णय जातलो, अशें तांणी सांगलें.
हे मजगतीं मंत्रीमंडळ फेरबदला विशीं उलोवपाक मुख्यमंत्री डॉ. प्रमोद सावंत हांणी न्हयकार दिलो. तशेंच कला आनी संस्कृती खात्याचे मंत्री गोविंद गावडे हांणी लेगीत कला अकादमींत दिल्ले भेटी वेळार आपल्या मंत्रीपदा विशीं कसलीच प्रतिक्रिया उक्तावंक ना.
गोंयांत खूब काळ मंत्रीमंडळ फेरबदलाची चर्चा चालू आसा. गोंयचें अर्थसंकल्पी अधिवेशन जाले उपरांत पहलगाम हल्लो जालो. शिरगांव जात्रेंत जाल्ले खेटाखेटींत 6 जाणांक मरण आयलें. हाका लागून मंत्रीमंडळ फेरबदल लांबणेर पडत रावलो. गरमी सोंपून आतां पावसाक सुरवात जाल्या. हे फाटभुंयेर मंत्रीमंडळ फेरबदला विशीं प्रदेश अध्यक्ष दामू नायक हांणी सूचक विधान केलां.
सध्याच्या मंत्रीमंडळांतल्या तिगांक काडून तीन आमदारांक मंत्रीपद मेळपाचीं चिन्नां आसा. कला आनी संस्कृती खात्याचे मंत्री गोविंद गावडे हांचे सयत आनीक दोन मंत्र्यांक नाल्ल मेळपाचीं चिन्नां आसात. कला अकादमीच्या नुतनीकरणांत जाल्ले भ्रश्टाचाराचे आरोप तशेंच तरेकवार विधानांक लागून मंत्री गोविंद गावडे हे सेगीत वाद ओडून घेत आसात. फाटल्या आयतारा प्रेरणा दिसाच्या फोंड्यां जाल्ले कार्यावळींत तांणी आदिवासी कल्याण खात्याचेर आरोप केले. आदिवासी कल्याण खातें हें मुख्यमंत्री डॉ. प्रमोद सावंत हांचे कडेन आसा. श्रमशक्ती भवना खाला कंत्राटदारांच्यो फायली तांकां कितें दिले बगर खात्यांत पावनात, अशें विधान तांणी केल्लें. आयतारा कार्यावळ जाली तेन्ना मुख्यमंत्री दिल्ली आशिल्ले. दुसऱ्या दिसा मंत्री गोविंद गावडे हांच्या विधानाचेर व्हड खवदळ पडलो. प्रदेश अध्यक्ष दामू नायक, खासदार सदानंद शेट तानावडे, सभापती रमेश तवडकार हांणी गावडे हांच्या विधानाक वक्तव्याक हरकत घेतली. मुख्यमंत्री डॉ. प्रमोद सावंत हांणी लेगीत कारवाय करपाची शिटकावणी दिली.
कला आनी संस्कृती मंत्री गोविंद गावडे हांचे कडेन आपूण चर्चा करतलो. तांची बाजू आयकून घेतलो. चर्चे उपरांत सगळे निर्णय जातले, अशें दामू नायक हांणी म्हणिल्लें. बिरेस्तारा गोविंद गावडे हांचे कडेन आपली चर्चा जातली, अशी म्हायती दामू नायक हांणी बिरेस्तारा सकाळीं दिल्ली. मात तांचे कडेन बसका वा चर्चा जावंक ना, अशी म्हायती गोपांनी दिली. हे चर्चे विशीं उमळशीक आसतनाच कला आनी संस्कृती मंत्री गोविंद गावडे हांणी कला अकादमीक भेट दिल्ली. मंत्रीमंडळ फेरबदल वा आपल्या मंत्रीपदा विशीं उलोवपाक तांणी न्हयकार दिलो.
हाचे उपरांत आल्तिनो बंगल्याचेर मंत्रीमंडळ फेरबदला विशीं उलोवपाक मुख्यमंत्री डॉ. प्रमोद सावंत हांणी न्हयकार दिलो. आदले केंद्रीय मंत्री सुरेश प्रभू हांणी शिश्टमंडळा सयत आपली भेट घेतली. मुंबय उच्च न्यायालयाचें कामकाज कोल्हापूर हांगा सुरू करपाची मागणी आसा. हे मागणेक तेंको दिवचो, अशी मागणी तांणी आपले कडेन केल्ल्याची म्हायती मुख्यमंत्र्यांनी दिली. प्रदेश अध्यक्ष दामू नायक हांणी मंत्रीमंडळ फेरबदलाचे संकेत दिले आसले तरी मंत्रीमंडळ फेरबदल हो मुख्यमंत्र्यांचो अधिकार आसा. मुख्यमंत्र्यांनी उलोवपाक न्हयकार दिल्ल्यान मंत्रीमंडळ फेरबदला विशीं ‘सस्पेन्स’ कायम आसा.
राज्यपाल गोंया भायर
राज्यपाल पी. एस. श्रीधरन पिल्लई हे गोंयांत ना. ते केरळांत गेल्ल्याची म्हायती गोपांनी दिली. ते शेनवार मेरेन गोंयांत पावतले. ते गोंयांत पावले उपरांत सोपूत सुवाळ्याच्यो हालचाली सुरू जातल्यो.
मंत्री आलेक्स सिक्वेरा हॉस्पिटलांत
भलायकेंत इबाड जाल्ल्यान कायदो आनी पर्यावरण मंत्री आलेक्स सिक्वेरा हे दिल्लींतल्या हॉस्पिटलांत उपचारा खातीर दाखल जाल्या. भलायकेंत सुदारणा जावचे पयलीं ते परत गोंयांत पावचे नात.
दामू – गोविंद भेट आयज
प्रदेश भाजप अध्यक्ष दामू नायक रातीं उसरां गोंयांत पाविल्ल्यान बिरेस्तारा तांची मंत्री गोविंद गावडे हांचे कडेन भेट जावपाक पावली ना. ही भेट आयज जातली, अशी म्हायती प्रदेश अध्यक्ष दामू नायक हांणी दिली. हाका लागून भेट जाले उपरांत आयज गोविंद गावडे विशीं निर्णय जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
