भांगरभूंय | प्रतिनिधी
पणजी: गोंयचे राज्यपाल पी. एस. श्रीधरन पिल्लई हांणी गोंय घटक राज्य दिसा निमतान गोंयच्या लोकांक परबीं भेटयलीं. राज्यपाल आपल्या संदेशात म्हणटा, गोंय घटक राज्य दिसाच्या ह्या म्हत्वाच्या प्रसंगार हांव गोंयच्या दरेका नागरिकाक म्हजी काळजा सावन उर्बेभरीत परबीं भेटयतां.
गोंय घटक राज्य दीस हो आमच्या राज्याच्या किर्तवंत इतिहासांतली म्हत्वाची घडणूक जावन आसा. १९८७ वर्सा ह्याच दिसा गोंय भारतीय संघराज्याचे २५ वें राज्य जालें. घटक राज्याची वाटचाल दिर्घ आनी आव्हानात्मक आशिल्ली. गोंय परकीय राजवटींतल्यान डिसेंबर १९६१ त मुक्त जाल्ले आसले तरी गोंयची वेगळी वळख दवरप वा शेजारच्या राज्यांत विलीन करप हो मुखेल प्रस्न आशिल्लो. १९६७ वर्सा जाल्ल्या जनमत कौलाच्या निर्णया वरवीं गोंयची खेरीत आनी स्वतंत्र वळख राखपाची लोकांची इत्सा पुराय जाली. ३० मे १९८७ हो दीस गोंयची खेरीत वळख राखपा खातीर गोंयकारांनी केल्ल्या चळवळीचो सन्मान जावन आसा. घटक राज्याचो दर्जो फावो जाल्ल्यान गोंयकारांचे दीर्घ काळाचे सपन खर्या लोकशाय भावनेंतल्यान पुराय जालें. राज्य घटनेन गोंयच्या लोकांक हक्काची अस्मिताय आनी आपलो स्वताचो फुडार घडोवपाची संद दिली.
ह्या खास प्रसंगार आमी ह्या इतिहासीक घडणूकेक योगदान दिल्ले फुडारी, बुदवंत आनी नागरिकांचो आदरान उगडास करूया. तांच्या प्रयत्नांतल्यान घटक राज्याचे स्वप्न सत्यात आयले आनी आमच्या राजकीय इतिहासात नवो अध्याय सुरू जालो.
आयज गोंय हे आधुनीक, फुडारलेले राज्य जावन आसा. आपली प्रगतीशील तत्वां आनी आदरातिथ्या खातीर गोंयकारांची वळख आसा. शांतीकाय, सामाजीक सलोखो आनी सैमीक सोबितकायेक लागून गोंय हे म्हत्वाचे पर्यटन स्थळ जाल्ले आसा. गोंय हांगाच्यो दर्यावेळो, धार्मिक स्थळां आनी वास्तुकलेच्या वारशा खातीर फामाद आसा. अस्तंत घाटाच्या रूपान गोंयांक समृध्द जैविकविविधताय लाभिल्ली आसा आनी ह्या जैविकविविधतायेक संवसारीक वळख फावो जाल्ली आसा.
गोंय राज्यान फाटल्या दशकांनी शिक्षण, भलायकी, साधनसुविधा अशां म्हत्वाच्या क्षेत्रांत तोखणाय करपा सारखी उदरगत केल्ली आसा. गोंय आयज लोकशाय तत्वांक पाळो दिवन कर्तव्य काल भावनेतल्यान वावर करता आनी विकसीत, समृध्द आनी आस्पावित राष्ट्र-विकसीत भारत निर्माण करपा खातीर योगदान दिता.
गोंय हे देशांतले एक ल्हान राज्य आसले तरी per capita income बाबतींत देशांतले दुसर्या क्रमाकाचे राज्य जावन आसा. उत्तर-दक्षीण आनी शारी-ग्रामीण वाठारांनी आस्पाविल्ले गोंय रस्ते, रेल्वे, विमान आनी दर्या मार्गान जोडिल्ले आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
