भांगरभूंय | प्रतिनिधी
म्हापशें ः बेलाविस्तावाडो, सांगोल्डा वाठारांत घराच्या सेप्टीक टँकांत (सोकपीट) पडून रूझारिओे फेलिक्स मास्कारेन्हस (५८) हाका मरण आयलें. रूझारिओ हे गोंयच्या एका दिसाळ्याचे कंपनींत मानव संसाधनपदार (एचआर) नोकरी करताले.
ही घडणूक बिरेस्तारा सकाळीं सुमार ६ वरांचेर घडली. जाल्यार सकाळीं सुमार १०.३० वरांचेर उक्ताडार आयली. रुझारिओ हे न्हिदेंतल्यान उठले उपरांत पासये खातीर घराचे फाटले वटेन गेल्ले. थंय सोकपिटाचे फरशीचेर तांचो पांय पडलो आनी ती फुटून ते भितर पडले. हातूंतच तांकां बुडून मरण आयलें.
सकाळीं सुमार ९ वरांचेर तांचें कुटूंब न्हिदेंतल्यान उठले उपरांत तांकां रूझारिओे घरांत नाशिल्ल्याचें समजलें. तांचो मोबायल आनी गाडयेची चावीय घरांतूच आशिल्ली. हाका लागून तांच्या कुटुंबियांनी ताका सोदलो. तेन्ना फाटले वटेन सोकपीटाची फरशी फुटिल्ली तांकां दिसली. भितर वाकून पळयतांच तांकां तातूंत रूझारिओ पडिल्ले दिसले. उपरांत साळगांव पुलीस आनी उजो पालोवपी दळाक फोन केलो.
पिळर्ण उजो पालोवपी दळाचे उपअधिकारी सनी फायदे हांच्या मार्गदर्शना खाला दळाच्या जवानांनी सोकपीटांतल्यान रूझारिओे हांची कूड भायर काडली. साळगांव पुलीस उपनिरीक्षक अक्षय गांवकार आनी वांगडी पुलिसांनी पंचनामो केलो आनी कूड पोस्टमार्टमा खातीर धाडली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
