भांगरभूंय | प्रतिनिधी
दोडामार्ग : दोडामार्ग-तिळारी मार्गान घांटाचेर लग्नाक वचपी प्रवाशांचे स्विफ्ट गाडयेचें स्टेअरिंग लॉक जाल्ल्यान मुखारच्यान येवपी अल्टो गाडयेचो धपको बसून अपघात जालो. हो अपघात कसई दोडामार्ग केळीचे टेंब हांगा बिरेस्तारा सकाळीं जालो. ह्या अपघातांत मदन कृष्णा सावंत (६७, कोलझर), सुभाष कुंभार (४०, गोंय) राजेंद्र कुंभार, सत्यवान तुकाराम धरणे (साटेली भेडशी) हे गंभीर जखमी जाल्ल्यान तांकां चड उपचारा खातीर गोंयांत धाडल्यात. जाल्यार सत्यवान कुंभार (२६) आनी रोहित सिंग (२५, गोंय) हे जखमी आशिल्ल्यान तांकां दोडामार्ग गांवगिर्या हॉस्पिटलांत दाखल केल्यात.
हे विशीं चड म्हायती प्रमाण, गोंयच्यान लग्नाक वतना दोडामार्ग केळीचे टेंब हांगा गाडयेचें स्टीअरिंग अचकीत लॉक जालें. हाका लागून मुखारच्यान येवपी गाडयेक स्विफ्टाचो नेटान धपको बसलो. हो धपको इतलो नेटान आशिल्लो, हातूंत दोनाय गाडयांचे चार प्रवासी गंभीर जखमी जाले.
थळाव्यांनी मजत करून ऍम्बुलन्सीचे मजतीन जखमींक दोडामार्ग ग्रामीण हॉस्पिटलांत उपचारा खातीर हाडले. मात चार जाणांक बरीच दुखापत जाल्ल्यान तांकां अदीक उपचारा खातीर गोंयांत धाडल्यात. जाल्यार दोगांचेर मुळावो उपचार सुरू आशिल्ल्याची म्हायती दोडामार्ग ग्रामीण हॉस्पिटलाक दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
