भांगरभूंय | प्रतिनिधी
चर्चे उपरांतूच घेतले निर्णय : दामू नायक
पणजी : आदिवासी प्रेरणा दीस कार्यावळींत सरकाराचेर केल्ले टिके विशीं कला आनी संस्कृती मंत्री गोविंद गावडे हांचे कडेन आयज प्रदेश भाजप अध्यक्ष दामू नायक चर्चा करतले. चर्चे उपरांतूच म्हत्वाचे निर्णय घेतले. गर्मी उणी जाल्ल्यान आतांच मंत्रिमंडळांत फेरबदल करपाक मेळटलें, अशें अध्यक्ष दामू नायक हांणी म्हणलें.
प्रदेश अध्यक्षांच्या ह्या विधानाक लागून दोगां मजगतीं जावपी चर्चेक म्हत्व आयलां. आयतारा फोंड्यां जाल्ले प्रेरणा दीस कार्यावळींत श्रमशक्ती भवना सकयल कंत्राटदारां कडल्यान कितेंयतरी घेवनूच तांच्यो फायली खात्यांत धाडटात, अशें वक्तव्य मंत्री गोविंद गावडे हांणी केल्लें. ते वादग्रस्त थारून कारवाये विशींचीं विधानां पक्षाच्या फुडार्यांनी केल्लीं. विरोधकांनीय मंत्री गावडे सत उलयल्यात, सरकारांत भ्रश्टाचार आशिल्ल्याची कबुली मंत्र्यांनीच दिल्ल्याची प्रतिक्रीया उक्तायल्ली. आदिवासी कल्याण खात्याच्या प्रशासना विशीं उलयिल्ल्याचें सांगतनाच वक्तव्याच्या माध्यमांनी विपर्यास केल्ल्याची प्रतिक्रीया मंत्री गोविंद गावडे हांणी मंत्रिमंडळ बसके वेळार केली. तांच्या ह्या विधाना उपरांत मुख्यमंत्र्यांनीय कारवाये विशीं कसलेंच भाशण करूंक ना.
मंत्री गोविंद गावडे हांचेर कारवाय जातली? हे विशीं जनतेक बरीच उत्सुकताय आसा. हाका लागून दामू – गोविंद हांचे चर्चेकडेन सगल्यांचें लक्ष आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
