भांगरभूंय | प्रतिनिधी
बेळगांव : पुराय संवसाराक २०२० वर्सा भेकडावपी कोरोना परत आयला. आतां मेरेनच्या नोंदीं प्रमाण, देशाच्या विवीध वाठारांत नव्या कोरोना दुयेतींचो आंकडो सुमार १२०० च्या वयर गेला.
केरळांत कोरोना संसर्गाचीं सगल्यांत चड प्रकरणां नोंद जाल्ल्याच म्हायती मेळ्ळ्या. मजगतीं, बेळगांवां कोरोनाक लागून ७० वर्सां पिरायेच्या एका जाण्ट्या मनशाक मरण आयलें. बिम्स हॉस्पिटलांत ह्या मनशाचेर उपचार सुरू आशिल्ले. बुधवारा जाल्ले तपासणेंत तो कोवीड पॉझिटीव्ह सांपडलो.
हो मनीस बेनकनहळ्ळी गांवचो. कांय दिसां आदीं तो दुयेंत आशिल्ल्यान ताका उपचारा खातीर बिम्स हॉस्पिटलांत दाखल केल्लो. उपरांत तो कोवीड पॉझिटीव्ह आयले उपरांत ताका कोवीड वॉर्डांत हालयलो. उपचाराक प्रतिसाद मेळूंक नाशिल्ल्यान ताका रातीं मरण आयलें.
कांय दिसां आदीं बेळगांवां लागसारच्या एका गांवांतले २५ वर्सां पिरायेचे बाळंत बायलेक कोवीड जाल्लो. ही बायल महाराष्ट्रांतल्यान प्रवास करून बेळगांवां आयिल्ल्याचें समजल्लें. सध्या ते बायलेची भलायकी थीर आसा. तिचेर उपचार सुरू आसात. तिणें यल्लूरच्या केएलई चॅरिटेबल हॉस्पिटलांतल्या डॉक्टरांचो सल्लो घेतिल्लो आनी उपरांत तिका केएलई डॉ. प्रभाकर कोरे हॉस्पिटलांत हालयिल्ली.
महाराष्ट्रांत पातळ्ळा कोरोना
महाराष्ट्रांत कोरोना दुयेतींचो आंकडो सेगीत वाडतूच आसा. बुधवारा कोरोनाचे ८६ नवे दुयेंती सांपडिल्ल्याची म्हायती मेळ्ळ्या. हाका लागून महाराष्ट्रांतल्या कोरोनाच्या सक्रीय दुयेतींचो आंकडोय आतां ३८३ चेर पावला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
