भांगरभूंय | प्रतिनिधी
पणजी: पावसाच्या दिसांनी गोंयच्या थळाव्या भाजयांचें उत्पादन उणें जाता. ह्या वेळार गोंयच्या कांय वाठारांनी तवश्यांचें उत्पादन करतात. फलोत्पादन म्हामंडळ थळावी तवशीं विकतीं घेता. फुडल्या चार वर्सांत म्हामंडळान 13.36 लाख कील तवशीं विकतीं घेतल्यांत. हातूंतल्यान शेतकारांक 3.64 कोटी रुपया दिल्यात. हे खातीर गोंय पावसांतल्या तवश्यांच्या उत्पादना विशीं स्वयंपुर्णतायेचे वाटेर आशिल्ल्याची म्हायती म्हामंडळाचे वेवस्थापकी संचालक चंद्रहास देसाय हांणी दिली.
देसाय हांणी सांगलें, फाटल्या कांय वर्सांत फलोत्पादन म्हामंडळाच्या हमी भाव येवजणेक लागून गोंयाक भाजये खातीर बेळगांवचेर निंबून रावचें पडना. गोंयांत जून ते सप्टेंबर मजगतीं पावसाचें प्रमाण चड आसता. अशा वातावरणांत हेर भाजयांचें उत्पादन उणें जाता. पूण केपें, सांगें, काणकोण आनी धारबांदोडें हांगासरल्या दोंगराळ वाठारांनी पोशक वातावरण आशिल्ल्यान थंय तवश्यांचें पीक घेतात. फाटल्या कांय वर्सां सावन म्हामंडळा कडलयान हें पीक विकतें घेतात.
हातूंतल्यान शेतकारांक अर्थीक फायदो जाता. हाका लागून फाटल्या कांय वर्सांत ह्या वाठारांतल्या शेतकारां कडल्यान तवश्यांचें पीक घेवपाचें प्रमाण वाडलां. अर्थीक वर्स 2021-22त म्हामंडळान ह्या वाठारांतल्या शेतकारां कडल्यान 1.91 लाख कील तवशीं खरेदी केल्ली. हे खातीर शेतकारांक 48.85 लाख रुपयांचो मोबदलो दिल्लो. 2022-23ते 52.02 लाख रुपयांची 1.90 लाख कील, 2023-24त 1.31 कोटी रुपयांची 4.82 लाख कील जाल्यार 2024-25त 1.31 कोटी रुपयांची 4.71 लाख कील तवशीं खरेदी केली.
पावसा उपरांत सादारणपणान सप्टेंबर ते मे मजगतीं गोंय स भाजयां खातीर स्वयंपूर्ण जालां. हातूंत तवशीं, भेंडो, चिटकी, कोंकण दुदी, वांयगीं आनी हरव्यो मिरसांगो हांचो आस्पाव आसा.
म्हामंडळाचे येवजणेक लागून शेतकारांक ह्या भाजयांचें चड उत्पादन घेवपाक प्रोत्साहन मेळ्ळां. ह्यो भाजयो विकत्यो घेवन तांची पुरवण म्हामंडळाच्या केंद्रांनी करतात. उरिल्ल्यो भाजयो बागायतदार तशेंच खाजगी दुकानांनी धाडून दितात. उरिल्ली भाजी बेळगांवां निर्यात करतात अशी म्हायती देसाय हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
