भांगरभूंय | प्रतिनिधी
पणजी: शाळा सुरू जावचे पयलीं दुरुस्तीचें काम पुराय करचें अशी मागणी विरोधी पक्ष फुडारी युरी आलेमांव हांणी काल (बुधवारा) केली. ‘‘हे विशीं लोकां कडल्यान कागाळी आयले उपरांत हांवें हो विशय खूब गंभीरतायेन घेतलो आनी ह्या सप्तकांत दुरुस्ती पुराय करपाची सुचोवणी अधिकाऱ्यांक केल्यात. सरकारान विद्यार्थ्यांची बरी जतनाय घेवपाची गरज आसा. तांची जीण आमी धोक्यांत घालपाक शकनात,’’ अशें आलेमांव हांणी सांगलें.
‘‘अशे तरेच्या गैरवेवस्थापनाक आनी नश्ट जाल्ल्या साधनसुविधांनी आमी राष्ट्रीय शिक्षण धोरण येसस्वीपणान चालीक लावपाक शकतले? शाळांचें खाजगीकरण करपा कडेन सरकाराचो कल आसा अशें दिसता, अशें आलेमांव हांणी सांगलें.
राज्यांतल्या सुमार 35 शाळांचे पाखीं दुरुस्ती खातीर उक्तीं केल्यांत, पूण संबंदीत खात्यान तें काम पुराय करूंक ना, असो उल्लेख तांणी केलाे.
‘‘ह्या कामाक 15 मे सावन सुरवात जाली. गोंयांत सादारणपणान मे म्हयन्याच्या निमाण्या सप्तकांत वा जूनाच्या पयल्या सप्तकांत पावस येता हें खबर आसून लेगीत तांणी कामाक गती दिली ना. ताका लागून पावसाच्या उदकांत शाळेंतलीं पुस्तकां आनी हेर वस्तूंचें लुकसाण जालां,’’ अशें आलेमांव हांणी सांगलें.
कामाक कळाव जाल्ल्यान गोंयांतल्या खूबशा शाळांक अडचणींक तोंड दिवचें पडटा, कारण दुरुस्ती खातीर पाखें उक्तें केल्ल्यान पावसाचें उदक वर्गांत घुसता, अशें तांणी सांगलें.
4 जूनाक शाळा सुरू जातल्यो. विद्यार्थ्यांक सुरक्षीत आनी अनुकूल शिकपाचें वातावरण मेळचें हे खातीर पर्यायी उपाय काडप गरजेचें आसा, अशें तांणी सांगलें.
सरकारान ह्या कामा कडेन आडनदर केल्ल्यान सध्याची परिस्थिती निर्माण जाल्या. हाचो परिणाम विद्यार्थी, पालक आनी शाळांचेर जातलो, अशें आलेमांव हांणी सांगलें.
शाळा सुरू जावचे पयलीं शिक्षण खात्यान हस्तक्षेप करून हें काम पुराय करचें अशी मागणी तांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
