भांगरभूंय | प्रतिनिधी
पूण तांचे बरोबरच्या सगल्यांचेर कारवाय करप अशक्य
पणजी: भंडारी समाजाच्या विरोधांत काम करपी उपेंद्र गांवकार हांकां बडतर्फ केला. पूण तांचे बरोबर वचपी सगल्यांचेर कारवाय करप सद्या तरी शक्य ना. हे विशीं आमी योग्य वेळार निर्णय घेतले अशी प्रतिक्रिया गोमंतक भंडारी समाजाचे अध्यक्ष देवानंद नायक हांणी दिली. बुधवारा पणजेंत जाल्ले पत्रकार परिशदेंत ते उलयताले. ह्या वेळार अशोक नायक, मंगलदास नायक, अवधूत नायक आनी हेर पदाधिकारी हाजीर आशिल्ले.
नायक हांणी म्हणलें, समाजाच्या नेमा प्रमाण समाजाच्या विरोधांत काम करप्यांचेर कारवाय करूं येता. सद्या उपेंद्र गांवकार हांणी नवी समिती काडल्या. तांचे बरोबर वचपी सगल्यांचेर कारवाय करपाची आसत जाल्यार पुराय गोंयांतल्या लोकांक बडतर्फ करचें पडटलें. अशें करप सद्या तरी शक्य ना. समजा आमी कारवाय केली जाल्यार समाजांतले हेर लोक आमचेर टिका करतले. तांचे वेले कारवाये विशीं आमी योग्य वेळार निर्णय घेतले.
तांणी म्हणलें, फोंड्यां काडिल्ले नवे समितींत गुरुनाथ नायक आसात. ते गोमंतक भंडारी समाजाच्या क्रेडीट सोसायटीचे अध्यक्ष आसात. हांचे कडल्यान समाजाक सांबाळून घेवपाची अपेक्षा आसा. तांणी समाजाक तोडपाचें काम करचे न्हय. ज्या क्रेडीट सोसायटींत समाजाचे पयशे आसात तांचे अध्यक्षूच जर अशे करूंक लागले जाल्यार आमी हाचेर आतां कांयच उलोवंक शकनात. आमी थारायलें जाल्यार कार्यकारी समितींत निर्णय घेवन तांकां लेगीत बडतर्फ करूंक शकतात. पूण आमी अशें केल्लें ना.
भौमान सुवाळो 29 जून दिसा
नायक हांणी सांगलें की, समाजांतल्या प्रज्ञावंत विद्यार्थ्यांचो 29 जून दिसा सत्कार करतले. ह्या वेळार तांकां शिश्यवृत्ती दितले. ही कार्यावळ म्हापशेंच्या प्रगती संकुलांत सकाळीं 9.30 वरांचेर सुरू जातली. इत्सुकांनी 2 ते 16 जून मजगतीं समाजाच्या म्हाल कचेरेंतल्यान अर्ज घेवप गरजेचें आसा. समाजा कडेन देणगी स्वरुपांत 78 लाख रुपया जमा आसात. ह्या कळंतराचेर आमी शिश्यवृत्ती दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
