भांगरभूंय | प्रतिनिधी
बीडीओ, पंचायत सचिवांक नोटीस
पणजी : सांताक्रुज पंचायतींत कोयर एकठांय करपी कामगारांक नितळ नाशिल्ल्या, बुरश्या वातावरणांत काम करचें पडटा. गरजेची सुरक्षा साधनां नाशिल्ल्यान तांची स्थिती वायट जाल्या. हे विशीं दाखल जाल्ले कागाळीची दखल घेवन राज्य मानवाधिकार आयोगान तिसवाडीचे गटविकास अधिकारी (बीडीओ) आनी सांताक्रुज पंचायतीच्या सचिवांक नोटीस जारी केल्या. हे कागाळीचेर आयोगा कडेन २० जुनाक सुनावणी जातली. हाका हजर रावपा वांगडा बाजू सादर करपाची नोटीस आयोगान आयकयल्या.
इनासियो पेरेरा हांचे कागाळीचेर मानवाधिकार आयोगाचे अध्यक्ष डेस्मंड डिकोस्ता आनी वांगडी प्रमोद कामत हांणी नोटीस जारी केल्या.
सांताक्रुज पंचायत वाठारांत कोयर एकठांय करपी कर्मचार्यांक युनिफॉर्म तशेंच ग्लोव्ज दिवंक़ ना. धोक्याचो, घातक आशिल्लो कोयरूय हातांनीच तांकां एकठांय करचो पडटा. घाणी पसून संरक्षण करपाक मास्क वापरपाची गरज आसा. मास्कूय तांकां दिवंक ना. तशेंच कोयर एकठांय करपी कामगार एमआरएफ शेडीच्या लागसाराच रावतात. घाणयार्या आनी भलायकेक वायट आशिल्ल्या वातावरणांत ते रावतात. थंयच तांकां जेवण करचें पडटा. ह्या सगल्या घाणयार्या वातावरणाचो तांचे भलायकेचेर परिणाम जावपाची शक्यताय आसा, अशें कागाळेंत म्हणलां.
इनासियो पेरेरा हांणी फोटवा सयत एप्रिलांत गटविकास अधिकारी तशेंच सांताक्रुज पंचायती कडेन कागाळ केल्ली. हे कागाळीची कोणेंच कसलीच दखल घेवंक नाशिल्ल्यान तांणी मानवाधिकार आयोगा मुखार कागाळ दाखल केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
