भांगरभूंय | प्रतिनिधी
पणजी : गोंय सरकाराच्या मुफत आयव्हीएफ (इन विट्रो फर्टीलायजेशन) उपचार येवजणेचो लाव घेतिल्ले एके बायलेन तीन सानुल्यांक (तिळीं भुरगीं) जल्म दिला. ते बायले सयत तिगांय भुरग्यांची भलायकी स्थीर आशिल्ल्यान आयव्हीएफ केंद्राचें हें व्हड येस आशिल्ल्याचें भलायकी मंत्री विश्वजित राणे हांणी म्हणलें.
लग्ना उपरांत जांकां भुरगें नासतना, ताचे खातीर सरकारान आयव्हीएफ येवजण सुरू केल्या. हे येवजणे खाला गोंय वैजकी महाविद्यालय हॉस्पिटलांत फुकट आयव्हीएफ केंद्र सुरू केलां. हाका लागून हे येवजणे खाला उपचार घेवप्यांक एकूय पयशे खर्च करचो पडना. आयव्हीएफ उपचारपद्धतींत बायलेच्या गर्भाशयांतल्यान तांतयां काडटात, जाल्यार दादल्यां कडल्यान शुक्राणू एकठांय करतात. प्रयोगशाळेंत तांतीं आनी शुक्राणू एकठांय करून गर्भ तयार करतात. हो गर्भ उपरांत गर्भाशयांत सोडटात. आयव्हीएफ पद्धतीन जल्मल्ल्या भुरग्यांक टेस्ट ट्यूब बेबी अशेंय म्हणटात. बायलेक आवयपण दिवपी ही आगळी वेगळी उपचाराची पद्धत जावन आसा.
सिजेरीयना पयलीं बोवाळाची स्थिती आसून लेगीत दोतोरांनी येसस्वी शस्त्रक्रीया केली. जल्मल्ल्या चल्याचें वजन २.३२ किलो जाल्यार दोन चलां १.७७ आनी १.५२५ किलो वजनाच्यो आसात. जांकां भुरगीं नात तांकां भावनीक आनी समाजीक समस्यांंक तोंड दिवचें पडटा. भुरगीं नाशिल्ल्यान जांचे जिणेंत ताण आसता तांचे खातीर आशेचो किरण आयव्हीएफ येवजणेक लागून निर्माण जाल्ल्याचें भलायकी मंत्री विश्वजीत राणे हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
