भांगरभूंय | प्रतिनिधी
रमेश मॅंडिसाच्या (5-47) उत्कृश्ठ बॉलिंगे उपरांत येजमान श्रीलंकेन पाकिस्ताना आड दुसरे टॅस्टीचो तिसऱ्या दिसाचो खेळ सोंप मेरेन दुसऱ्या डावांत 5 विकेटी वगडावन 176 धांवड्यो करून आपली स्थिती घटमूट केल्या. उण्या उजवाडाक लागून खेळ बेगीन थांबोवचो पडलो. ताची वट्ट आघाडी 323 जाल्या आनी ताच्यो अजून पांच विकेटी पडपाच्यो आसात.
पाकिस्तानाच्या बॉलरांनी दुसऱ्या डावांत थारावीक अंतरान विकेटी घेतल्यो. पूण, मुखेली दिमुथ करुणारत्ने आनी धनंजय डिसिल्वा हाणें सवे विकेटी खातीर नाबाद 59 धांवड्यांची भागिदारी करून श्रीलंकेची आघाडी 300 वयर पावयली.
पाकिस्तानान फाटले मॅचींत ह्याच मैदानाचेर 342 धांवड्यांची मोख 6 विकेटी वगडावन मेळयिल्ली. ताका लागून श्रीलंके दुसरे मॅचींत आपली आघाडी आनीक वाडोवपाक सोदतलो.
फाटीचे दुखापतीक लागून मैदान सोडपी ओपनर बॅट्समन करुणारत्ने चवथी विकेट पडल्या उपरांत खेळपट्टीचेर देंवलो. तो 27 धांवड्यो करून आनी डिसिल्वा 30 धांवड्यो करून खेळपट्टीचेर आसा.
करुणारत्नेचे सुवातेर डावाची सुरवात करपी विकेटकीपर बॅट्समन निरोशन डिकवेलाक (15) नसीम शाहान बाद केलो. यासिर शाह, मोहम्मद नवाज आनी आगा सलमान हे स्पिनरांचे तिकडीन दरेकी एक विकेट घेतली.
ते पयलीं पाकिस्तानान दिसाची सुरवात 7 बाद 191 धांवड्यां वयल्यान केली आनी उरिल्ल्या बॅट्समनांनी 40 धांवड्यांची भर घाली.
यासीर आनी हसन अली हांणी आठवे विकेटी खातीर 32 धांवड्यांची भागिदारी केली. प्रभात जयसुर्यान हसनाक बाद करून ही भागिदारी फोडली. ते उपरांत मॅंडिसान उरिल्ल्यो दोनूय विकेटी घेवन पाकिस्तानाचो डाव सोंपोयलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
