भांगरभूंय | प्रतिनिधी
नवी दिल्ली, खबरां संस्था ः भारतांत किडनी स्टोनाचे प्रमाण वाडत आसा. एशियन इन्स्टिट्यूट ऑफ नेफ्रोलॉजी अँड युरोलॉजी (AINU) प्रमाण, तेलंगणात दर दिसा सुमार 300-400 दुयेंती किडनी स्टोन जाल्ल्याच्यो कागाळी करतात. हे प्रमाण सामान्य आंकड्या परस दुप्पट आसा. चिंतेची गजाल म्हळ्यार ही प्रकरणां 40% दरान नेटान वाडत आसात आनी ताचो चडसो परिणाम 20-40 वर्सां पिरायेच्या लोकांक जावपाक लागला.
एआयएनयू तज्ञांच्या मतान, गिमाच्या दिसांनी तरणाट्यां मदीं किडनी स्टोन जावपाचें प्रमाण वाडपा फाटल्यान जायतीं कारणां आसात. हातूंत डिहायड्रेशन म्हळ्यार कुडींत उदकाचो उणाव हें एक मुखेल कारण. हाचे भायर वायट जिणे पद्दतीक लागून हो धोको आनीक वाडटा.
‘नॅशनल सेंटर फॉर बायोटेक्नॉलॉजी इन्फॉर्मेशन’च्या अहवाला प्रमाण, भारतांतल्या 12% परस चड लोकांक किडनी स्टोन आसा. जिणे पद्दतींत कांय सादे बदल केल्यार हो धोको उणो करूं येता.
एआयएनयूच्या मतान गिमाच्या दिसांनी किडनी स्टोनाचो धोको वाडटा कारण ह्या काळांत कुडींतल्यान घामाच्या रुपांत व्हड प्रमाणांत उदक, मीठ आनी इलेक्ट्रोलाइट्स भायर सरता. हाका लागून कुड डिहायड्रेट जाता आनी मुताचो प्रवाह उणो जाता.
किडनी स्टोन जावपाची कारणां…
कुडींत उदकाचो उणाव, चड वेळ वतांत रावप, चड मीठ आशिल्ली खाणां खावप, फास्ट फूड आनी जंक फूड खावप, प्रमाणा भायर वजन आसप वा मोटसाण आनी पयलीं सावन कुटुंबातल्या कोणाकूय किडनी स्टोन आसल्यार किडनी स्टोन जावपीचो धोको चड आसात.
किडनी स्टोनाची लक्षणां….
फाटीच्या सकयल्या भागांत, खाकेत वा पोटांत दुखप, मुतना दुखप, मुताचो रंग बदलप वा वास येवप, ओंकारे येवप, थकवो जाणवप, ताप आनी थंडी.
किडनी स्टोन टाळपाचे उपाय…
दिसभरांत 7-8 पेले उदक पियेवचें, सदां अर्दे वर तरी व्यायाम करात, पांचव्यो भाजयो, फळां आहारांत आस्पावची, चड मीठ आनी प्रक्रिया केल्ली खाणा टाळात, सोरो पियेवप वा धूम्रपान करप टाळप, पयलीं किडनी स्टोन जाल्लो आसल्यार नेमान तपासप, लक्षणां दिसल्यार दोतोरांचो सल्लो घेवचो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
