भांगरभूंय | प्रतिनिधी
मडगांवः मडगांवतले एके तरणाटे बायलेक ऑनलायन नोकरी दिवपाचें हांयस दाखोवन 1.77 लाख रुपयांची तिका तोपी घाली. हे संबंदीं मडगांव पुलिसांनी अनवळखी आड गुन्यांव नोंद केलां.
मेळिल्ले म्हायती प्रमाण, मडगांव वाठारांतल्या रीमा फर्नांडीसान मडगांव पुलीस स्टेशनांत कागाळ नोंद केल्या. ही फटवणूकेची घडणूक 6 आनी 7 मार्चाक घडली. दुबावितान कागाळदार रिमा फर्नांडीसा कडेन मोबायलाचेर संपर्क सादलो आनी तिका नोकरी दिवपाचें उतर दिलें. ताणें तिका ऑनलायन पार्ट टायम नोकरी दिवपाचें हांयस दाखोवन हाचे खातीर पयशे भरचे पडटले अशें सांगलें. आनी तिका वेगवेगळे बँक खातें क्रमांक दिवन 1.77 लाख रुपया रक्कम जमा करपाक सांगली. पयशे भरीमेरेन दुबावीत संपर्कांत रावलो आनी पयशे भरले उपरांत ताणे तिका प्रतिसाद दिवप बंद केलें. हाका लागून बायलेक आपली फटवणूक जाल्ल्याचें कळ्ळें. ते उपरांत तिणें मडगांव पुलिशेंत कागाळ दाखल केली. ते उपरांत अनवळखी दुबाविताचेर मडगांव पुलिसांनी फटवणूक केल्ल्याचो गुन्यांव नोंद केलो आनी फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
