भांगरभूंय | प्रतिनिधी
पणजी: गोंयात प्रादेशीक विमान सेवेची पुरवण करपी फ्लाय९१ न गोंय ते सोलापूर मजगतीं सरळ उड्डाण सुरू करपाची घोशणा केल्या. ह्या नव्या मार्गाक लागून फ्लाय ९१ भारतांतल्या वट्ट आठ शारांनी विमानसेवा सुरू करतले, हातूंत महाराष्ट्रांतलें पुणे, जळगांव, सिंधुदुर्ग आनी आतां सोलापूर हांचो आसपाव आसा.
गोंय- सोलापूर मार्गा खातीर आतां बुकींग सुरू जालां. तिकेटी फ्लाय९१ चे वेबसायटीचेर आसात. फ्लाय ९१ एक सुरक्षीत आनी विस्वासू प्रवासाचो पर्याय दिता. हाका लागून गोंयच्या पर्यटनाक आनी सोलापूरच्या धर्मीक आनी उद्देगीक वैशिश्टांक दोनूय भागांतल्या प्रवाशां खातीर प्रवास चड सुरळीत जातलो.
सोलापूर हें महाराष्ट्रांतलें एक म्हत्वाचें शार. कपड्यांच्या उद्देगा खातीर ताची वळख आसा. वांगडा, सोलापूर हें धर्मीक नदरेंतल्यान म्हतवाचें स्थान, कारण तें पंढरपूर (विठ्ठल- रुक्मिणी देवूळ), तुळजापूर (तुळजा भवानी देवूळ), अक्कलकोट (स्वामी समर्थ महाराज देवूळ), गंगापूर (श्री नरसिंह सरस्वती स्वामी मठ) आनी भीमाशंकर ह्या पांच नामनेच्या तीर्थक्षेत्रांचें प्रवेशदार मानतात.
गोंय- सोलापूर मार्गाची सुरवात परंपरीकपणान उणी सेवा आशिल्ल्या भागांतलो हवाई संपर्क सुधारपाचेर फ्लाय ९१ चें लक्ष्य आशिल्ल्याचें फ्लाय ९१ चे वेवस्थापकीय संचालक आनी मुखेल कार्यकारी अधिकारी मनोज चाको हांणी सांगलें. आमचे विमानसेवेक लागून यात्रेकरूंक तशेंच वेवसाय आनी सुशेगाद प्रवास करप्यांक सोलापूरांत सुरक्षीत प्रवास करपाक मेळटलो, अशें ताणें फुडें म्हणलें.
सोलापूराक विस्तार करतना फाटबळ दिवपी नागरी विमान येरादारी मंत्रालय, महाराष्ट्र सरकार, नागरी विमान येरादारी महासंचालक, भारतीय विमानतळ प्राधिकरण, हिंदुस्तान पेट्रोलियम कॉर्पोरेशन लिमिटेड आनी हेर सगल्या भागधारकांचें फ्लाय ९१ न उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
