भांगरभूंय | प्रतिनिधी
नवी दिल्ली, खबरां संस्थाः हवामान खात्यान जाहीर केल्ल्या ताज्या अदमासा प्रमाण अंदूंच्या हंगामांत सरासरी परस चड पावस पडपाची शक्यताय आसा. मंगळारा हवामान विभागान सांगलें, भारतांत सरासरी परस 106 टक्के चड पावस पडपाची शक्यताय आसा. हो अदमास एप्रीलांत केल्ल्या अदमासा परस चड आसा. भारतांत दीर्घकाळ सरासरी पावस 868.6 मिमी आसा. 2025 वर्साच्या मान्सून हंगामांत (जून ते सप्टेंबर) पुराय देशांत सरासरी परस चड पावस पडपाची शक्यताय आसा अशें हवामान खात्यान सांगलां. भारत हवामान विभागान प्रेस पत्रां वरवीं ही म्हायती दिल्या.
हवामान विभागान प्रेस पत्रां म्हणलां, जून ते सप्टेंबर 2025 ह्या काळांत देशाचो ईशान्य आनी वायव्य भाग सोडल्यार भारतांतल्या चडशा वाठारांनी सरासरी परस चड पावस पडटलो. जून म्हयन्यांतच देशांत सरासरी 16.7 सेंमी परस उण्यांत उणो 8% चड पावस पडपाची शक्यताय आसा.
फाटल्या पांच वर्सांत दोन फावटीं म्हणल्यार 2022 आनी 2024 वर्सा मान्सून वेळा पयलीच पावलां. आयएमडीच्या आंकडेवारी प्रमाण, 2022 आनी 2024 वर्सा अनुक्रमान 29 मे आनी 30 मे सावन मान्सून सुरू जाल्लो. नैऋत्य मान्सूनाची सामान्य सुरवात 1 जून सावन जाता. पूण अंदूं एक सप्तक आदीं म्हणल्यार 24 मे सावन नैऋत्य मान्सून केरळांत पावलो. हाका लागून अंदूं भारतांत सरासरी परस चड पावस पडपाची शक्यताय हवामान खात्यान उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
