गोल्डन डोम जाय जाल्यार देश आमकां जोडात

भांगरभूंय | प्रतिनिधी

अमेरिकेचें कॅनडाक आवाहन : कॅनडा म्हणटा, देश विकूंक काडूंक ना

न्यूयाॅर्क : ‘गोल्डन डोम’ ह्या क्षेपणास्त्र संरक्षण यंत्रणेंत (Golden Dome’ Missile Defense System) वांटेकार जावपाक जाय जाल्यार ६१ अब्ज डाॅलर दिवचे पडटले. पूण जर कॅनडा अमेरिकेचें ५१ वें राज्य जावपाक तयार आसल्यार तांकां एकूय डाॅलर भरचो पडचो ना, अशें अमेरिकेचे अध्यक्ष डोनाल्ड ट्रम्प हांणी म्हणलां. मात ताचेर आमी आमचो देश विकपाक काडूंक ना, अशी प्रतिक्रिया कॅनडाचे प्रधानमंत्री मार्क कार्ने हांणी कांय दिसां पयलींच खुद्द व्हायट हावसांतूच उक्तायिल्ली. तरीय ट्रम्प हांणी कॅनडा अमेरिकेन विरघळावन उडोवची अशी इत्सा उक्तायल्या.
कॅनडान हालींच क्षेपणास्त्र संरक्षण यंत्रणेचो एक वांटो जावपाची इत्सा उक्तायिल्ली. दुस्मानांची शस्त्रां नश्ट करपाक ही पद्दत सुरू करपाचो विचार ट्रम्प हांणी अधिकृतपणान जाहीर केल्लो. ‘तुमकां ६१ अब्ज डाॅलर दिवचे पडटले. आमच्या देशाक तुमचो देश जोडून आमचें राज्य जाल्यार तुमकां सगलें कितें फुकट मेळटलें. कॅनडा हाचेर विचार करता,’ अशें ट्विट ट्रम्पान केलां. प्रधानमंत्री कार्नेची आदली प्रतिक्रिया सोडल्यार कॅनडान अजून हे नवे घडामोडीचेर प्रतिक्रिया दिवंक ना. कॅनडा हे पद्दतीचो वांटो जावपाक सोदता, अशें ट्रम्पान फाटीं सांगिल्लें, तेन्ना कार्नेन आमी उंचेल्या पांवड्यार चर्चा करतात, अशें म्हणिल्लें.
२०२९ जावपी हे क्षेपणास्त्र यंत्रणेचेर १७५ अब्ज डाॅलर खर्च जातलो, अशें ट्रम्पान हालींच जाहीर केल्लें. तज्ञांच्या मतान, हो खर्च ५२० अब्ज डाॅलरां मेरेन वचपाक शकता.

गोल्डन डोम म्हणल्यार?
सध्या आयर्न डोम इझ्रायल वापरता. अमेरिकेन ती विकसीत करपाक मजत केल्या. कोणेय क्षेपणास्त्र वा ड्रोन वरवीं हल्लो केलो जाल्यार तें आकाशांतूच नश्ट करतात. रडाराचेर हे विशीं आपशीच म्हायती मेळटा आनी जमनी वयल्यान क्षेपणास्त्र वचून तें नश्ट करता. अमेरिकेचो प्रस्तावीत गोल्डन डोम हो तसोच काम करतलो, पूण व्हडल्या प्रमाणांत. बॅलेस्टीक, हायपरसोनिक, क्रुझ क्षेपणास्त्रां तो वयले वयर नश्ट करतलो. म्हणल्यार अमेरिके भोंवतणी अदृश्य घुमट कशें निर्माण जातलें. फक्त जमनी वयल्यानूच न्हय जाल्यार अंतराळांत पसून (पृथ्वीचे लागीं) अमेरिकेची टेहळणी यंत्रणा घुंवतली. ती क्षेपणास्त्रांचेर नदर दवरतली. रोनाल्ड रिगन हांणी १९८३ असले यंत्रणेचो प्रस्ताव मांडिल्लो.