आरसीबी क्वॉलिफायर एकांत

भांगरभूंय | प्रतिनिधी

लखनौः रॉयल चॅलेंजर्स बंगळुरून येजमान लखनौ सुपर जायण्ट्साक 6 विकेटींनी हारयलो. ह्या जैता सयत बंगळुरून क्वॉलिफायर एकांतली सुवात निश्चीत केली. ह्या जैतान ताचे 14 मॅचींतल्यान 19 गूण जाले. ताणें गुणक्रमवारींतली दुसरी सुवात मेळयली.

दुसरे वटेन लखनौचो समारोप हारीन जालो. मुखेली ऋषभ पंताच्या शेंकड्या उपरांत लेगीत लखनौक हार घेवची पडली. लखनौ गुणक्रमवारींत 7वे सुवातेर उरलो.

बंगळुरूक जैता खातीर 228 धांवड्यांची मोख मेळिल्ली. ताणें 18.4 ओव्हरींनी 4 विकेटी व्हगडावन 230 धांवड्यो करून जैत जोडलें. जितेश शर्मा बंगळुरूच्या जैतांत पर्जळ्ळो. ताणें मुखेल्याक सोबा सारको खेळ केलो. ताणें नाबाद 85 धांवड्यांची खेळी केली. विराट कोहलीन लेगीत अर्द शेंकड्याची खेळी केली.

ते आदीं मुखेली ऋषभ पंत (नाबाद 118) हाचो उत्कृश्ट शेंकडो आनी मिचेल मार्श (67) हाच्या वांगडा केल्ले 152 धांवड्यांचे भागिदारी नेटार आपले निमाणे लीग मॅचींत 3 विकेटी व्हगडावन 227 धांवड्यो केल्यो.

इंग्लंड भोंवडे पयलीं ऋषभ पंत फॉर्मांत येवप भारताचे दिश्टीन बरी गजाल आसा. अंदूंच्या हंगामांत सगल्यांत म्हारगो खेळगडो थारिल्ल्या पंताक पूर्ण हंगामांत धांवड्यो करपाक झुजचें पडिल्लें. पूण, काल मॅथ्यू ब्रित्झके (14) रोखडोच बाद जाल्या उपरांत खेळपट्टीचेर आयिल्लो पंत वेगळ्याच मुडांत दिसलो. मैदानांच देंवना फुडें ताणें मैदानाचे चारूय वटेन सके आनी चवक्यांचो पावस घालो आनी पळयता पळयता अंदूंच्या हंगामांतलो अपलो दुसरो अर्द शेंकडो फकत 29 बॉलांनी पूर्ण केलो. अर्द शेंकडो पूर्ण केल्या उपरांत लेगीत पंताची भूक उणी जाली ना. ताणें आयपीएलाच्या इतिहासांतलो आपलो दुसरो शेंकडो फकत 54 बॉलांनी पूर्ण केलो. ताणें 10 चवके आनी स सके मारले. ताणें 61 बॉलांनी 11 चवके आनी आठ सक्यांचे मजतीन नाबाद 118 धांवड्यो केल्यो.

अटल बिहारी इकाना स्टेडियमाचेर लखनौ सुपर जायण्ट्साचो हो सर्वोच्च स्कोर थारलो. हाचे पयलीं ताचो सर्वोच्च स्कोर 205 आशिल्लो. कोलकाता नायट रायडर्सान ह्याच मैदानाचेर 235 धांवड्यो केल्यात.

मार्शान 37 बॉलांनी 67 धांवड्यो केल्यो. ताणें चार चवके आनी पांच सके मारले. निकोलस पुरन अपेशी थारलो. तो फकत 13 धांवड्यो करून बाद जालो.

रॉयल चॅलेंजर्स बंगळुरू वतीन नुवान थुसारा, भुवनेश्वर कुमार आनी रोमारियो स्टिफर्ड हांकां एकेक विकेट फावो जाली.