भांगरभूंय | प्रतिनिधी
पणजीः आदिवासी भवनाचें काम कायदेशीर कोंफुसावांक लागून ह्या प्रकल्पाचें काम आडखळून उरलां. प्रकल्पा खातीर कोमुनिदादीन दिल्ले सुवातेचेर दुसऱ्या पक्षान दावो केला देखून हे विशींची फुडली प्रक्रिया करपा खातीर कायदेशीर सल्ल्या उपरांतच जातली अशें आदिवासी कल्याण संचालनालयाच्या वरिश्ठ अधिकाऱ्यान सांगलें.
परवरे उदका स्त्रोत खात्या लागसार राष्ट्रीय म्हामार्गा कुशीचे सुवातेंत आदिवासी भवन प्रस्तावीत जाल्लें. ह्या भवनाचो बुन्यादी फातर बसोवन 4 वर्सां जालीं. पूण थंय कसलेंच बांदकाम जावंक ना आनी पुराय सुवात रिती आसा. हे सुवातेचो वापर कुशीचे शोरूम धनी आपल्या खाजगी कामा खातीर वापर करतात. जो बुन्यादी फातर बसयिल्लो तो लेगीत कोसळून ताचे अवशेश गायब जाल्यात.
हे विशीं मंत्री गोविंद गावडे हांणी प्ररेणा दिसा निमतान तिडक उक्तावन सरकाराक वडीर काडिल्ले. आदिवासी भवना विशीं कसलीच फाटपुरवण सरकारा कडल्यान जायना. हें भवन केन्ना पुराय जातलें हें मुख्यमंत्र्यांनी जाहीर करचें, अशें आव्हान गावडे हांणी दिल्लें.
हे विशीं उलयतना आदिवासी कल्याण संचालनालयाच्या वरिश्ठ अधिकाऱ्यान सांगलें की जी सुवात आदिवासी भवना खातीर प्रस्तावीत केल्ली ती सुवात वादांत सापडिल्ल्यान ह्या प्रकल्पाचें काम आडखळून उरलां.
ही सुवात आमकां परवरे कोमुनिदादीन दिल्ली. पूण बुन्यादी फातर बसयले उपरांत दुसऱ्या पक्षान हे सुवातेचेर आक्षेप घेवन हे सुवातेची मालकी कोमुनिदादीन आपल्याक पयली दिल्ली अशें सागून हे सुवातेचेर आपलो दावो सांगलां. सद्या हें प्रकरण मामलेदाराचे कचरेंत सुनावणे खातीर आसा, अशें अधिकाऱ्यान सांगलें.
कायदेशीर कोंफुसावांत जमनीचो विशय घुस्पल्ल्यान आमी अॅडव्होकेट जनरनल हांचे कडेन कायदेशीर सल्लो मागयला. हो कायदेशीर विशय आशिल्ल्यान हे प्रकल्पाची पुराय फायल एजी कडेन आसा. देखून ह्या प्रकल्पाचेर अदीक म्हायती दिवपाक मेळना अशें अधिकाऱ्यान म्हणलें.
14 ऑगस्ट 2021 दिसा मुख्यमंत्री डॉ. प्रमोद सावंत हांचे हस्तुकीं परवरे ह्या भवनाचो बुन्यादी फातर बसयिल्लो. त्या वेळार गोविंद गावडे हे आदिवासी कल्याण मंत्री आशिल्ले.
ह्या प्रकल्पांत आदिवासी कल्याण खातें आनी एसटी/एससी आयोगाची कचेरी स्थलांतीर जावपाची आशिल्ली. तेच वांगडा प्रकल्पाच्या तळ माळ्यार दुकानां काडून तातूंतल्यान महसूल एकठांय करपाची येवजण आशिल्ली. तशेंच विवीध कार्यावळीं खातीर हॉल, एसटी समुदायाच्या विद्यार्थ्यां खातीर हॉस्टेल, जीम आनी हेर गरजेच्या सुविधांचो आस्पाव ह्या भवनांत करपाचो प्रस्ताव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
