भांगरभूंय | प्रतिनिधी
वास्कोः मांगोर हिलच्या थळाव्याचेर पोशिल्ल्या सुण्यान हल्लो केल्ल्याची घडणूक २१ मेक दनपरां १.३० वरांचेर घडिल्ली. हे विशीं वास्को पुलिसांनी ह्या सुण्याच्या धनयाक जापसालदार थारायत दोन बायलां आड गुन्यांव दाखल केला.
हे विशीं लक्ष्मी पिल्लई हांणी कागाळ दाखल केल्ली. तांचे कागाळी प्रमाण, गुडिया सिंग आनी अस्मिता सिंग हांच्या पोशिल्ल्या सुण्यान पिल्लई हांचेर हल्लो करीत गंभीर जखमो केल्ल्यो. ह्या बायलांनी पिल्लई हांकां वायट उतरां दिवन ह्या वाठारांत आनीक सुणीं हाडून सोडपाची धमकी दिल्ली.
ह्या प्रकारा उपरांत पिल्लई हांणी वास्को पुलीशेंत कागाळ दाखल केल्ल्यान पुलिसांनी भारतीय न्याय संहिता, २०२३ च्या कलम ३(५) सयत कलम २९१ आनी ३५२ खाला गुन्यांव दाखल केला. घडणुकेचो फुडलो तपास पीआय वैभव नायक हांचे देखरेखी खाला आनी मुरगांव उपअधीक्षक गुरुदास कदम हांच्या मार्गदर्शनाखाला पीएसआय प्लेटो कार्व्हालो करतात.
सरकारा कडल्यान निर्बंध
पोशिल्ल्या सुण्याच्या हल्ल्याक लागून मरण येवपाच्यो वाडपी घडणुको हें चिंतेचें कारण जालां. राज्य सरकारा वतीन सुण्यांच्या २३ आक्रमक जातींचेर बंदी घाल्या. हातूंत पीटबूल, रॉटवेलर, टेरिएर, मास्तिफ्स, वुल्फ डॉग्स आनी तांच्या मिश्र जातींचो आसपाव आसा. कांय दिसां आदीं हणजूणां एका ९ वर्सां पिरायेच्या चल्याचेर पीटबूल सुण्यान हल्लो करून ताच्या शरिराचेर खोल जखमो केल्ल्यो. हातूंत त्या भुरग्याक मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
