भांगरभूंय | प्रतिनिधी
सांखळे महाविद्यालयांत लेनोवो डिजिटल इनोव्हेशन लॅबाचें उक्तावण
दिवचल: गोंयच्या हुशार विद्यार्थ्यांचो फुडार तांच्याच हातांत आशिल्ल्यान व्हड सपनां पळयात, धाडशी जावन नाविन्यपूर्ण जायात आनी डिजिटल भारताचें शिल्पकार जायात असो उलो मुख्यमंत्री डॉ. प्रमोद सावंत हांणी सांखळे मारलो.
राज्यांतल्या सगल्या सरकारी महाविद्यालयांत विवीध मळांचेर स्टार्ट अप केंद्र सुरू करतले. हाचे वरवीं कुशळ विकास, उत्तम संभाशण आनी हेर कुशळटाय मेळचो होच हेत आशिल्ल्याचें डॉ. सावंत हांणी स्पश्ट केलें.
सांखळेच्या शासकीय कला, विज्ञान आनी वाणिज्य महाविद्यालयांत लेनोवो डिजिटल इनोव्हेशन लॅबचें उक्तावण डॉ. सावंत हांचे हस्तुकीं जालें. लेनोवो इंडियाचे वेवस्थापकीय संचालक शैलेंद्र कात्याल ह्या वेळार हजर आशिल्ले.
हो उपक्रम राष्ट्रीय शिक्षण धोरण (एनईपी) २०२० च्या दृश्टीकोना कडेन पुरायेन सुसंगत आशिल्ल्यान विद्यार्थ्यांक एआय, रोबोटिक्स, कोडिंग आनी डिझाइनांत फुडार करपा खातीर तयार केल्लीं कुशळटाय भेटयता.
हें सपन प्रत्यक्षांत हाडपाक लेनोवो, भारतकेअर्स आनी सीएसआरबॉक्स वांगडा भागीदारी करतना तंत्रज्ञान-चालित शिक्षण वाडोवपाची आमची वचनबद्धताय आदले परसूय पयलींच घटमूट आसा अशें मुख्यमंत्र्यान म्हणलें.
स्मार्ट क्लासरूम पसून ते आयटीआयंत कौशल्य प्रशिक्षण, एआय चॅटबॉट्स ते पंचायतींत ई-गव्हर्नन्स मेरेन, आमी एक स्वयंपूर्ण गोंय बांदतात. जें समावेशक, नाविन्यपूर्ण आनी फुडारा खातीर सज्ज आसतले. राज्यांत सगल्या सरकारी महाविद्यालयांनी विवीध मळांचेर स्टार्ट अप केंद्रां सुरू करतले. हाचे वरवीं कौशल्य उदरगत, संभाशण आनी हेर कुशळटायो मेळच्यो होच हेतू आसा. विवीध भासो आत्मसात करतना तांत्रीक डिजिटल आनी हेर ज्ञान घेवप करियरा खातीर गरजेचें. हाका लागून उत्तुंगतेचें सपन पुराय करात अशें मुख्यमंत्र्यानी मुखार म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
