भांगरभूंय | प्रतिनिधी
पंचकुला, खबरां संस्था: हरियाणांतल्या पंचकुल शारांत सोमारा रातीं उसरां एकाच कुटुंबांतल्या सात जाणांनी वीख पिवन आत्महत्या केली. हे विशीं म्हायती मेळटांच पुलीस घडणुके सुवातेर पावले. त्या सगल्यांक उपचारा खातीर हॉस्पिटलांत व्हेलीं.
हें कुटूंब मुळचें उत्तराखंडच्या डेहराडूनचें. सोमारा तें बागेश्वर धामचे बाबा धीरेंद्र शास्त्री हांची कथा आयकुपा खातीर पंचकुल आयिल्लें. मरण आयिल्ल्या मदीं प्रवीण मित्तल, तांची घरकान्न, जाण्टे पालक आनी ३ भुरग्यांचो आसपाव आसा.
सुत्रांनी दिल्ले म्हायती प्रमाण, प्रवीण मित्तल हांणी कांय काळा पयलीं डेहराडूनांत टूर अँड ट्रॅव्हल्सचो वेवसाय सुरू केल्लो. थंय ताका अपेस आयलें. हाका लागून पुराय कुटुंबान कथेंतल्यान परततना हें पावल उबारलें आसुंये.
सोमारा रातच्या सुमार ११ वरांचेर गाडयेंत बशिल्ल्या लोकांनी वीख घेतिल्ल्याचो फोन पुलिसांक आयलो. तेन्ना तांची स्थिती खुबूच गंभीर आशिल्ली. पुलिसांचो पंगड घडणुके सुवातेर पावलो. थंय पुलिसांक ६ जाणां बेशुद्ध अवस्थेंत सांपडलीं. तांकां बेगोबेग सेक्टर २६ तल्या ओजस हॉस्पिटलांत व्हेलीं. मात कांय वेळांतूच त्या सातूय जाणांक मरण आयलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
