भांगरभूंय | प्रतिनिधी
भारता सारक्या उश्ण कटिबंधीय देशांत गिमाचो काळ अत्यंत खर आसता. वाडत वचपी तापमानाक लागून कुडींतलें उदक उणें जाता. मनशाचे भलायकेचे नदरेन उश्णतायेचो आघात जावपाचो धोको वाडटा आनी पचन तंत्राचेरूय परिणाम जाता. ह्या संदर्भांत परंपरीक आयुर्वेदीक आनी घरगुती उपाय खूब उपेगी पडटात. तातूंतलें एक जिऱ्याचें उदक. हो सादो पूण प्रभावी घरगुती उपाय उमाळ्यांत कुडीक थंडसाण दिताच पूण भलायकेक जायते लाव दिता. गिमाच्या दिसांनी कुडीचें चड तापमानान कुडींत निर्जलीकरण, थकसाण येवप, कांतीचे त्रास, अपचन, मुळव्याधीचे अशे त्रास जातात. चड हुनतांत भायर सरपी लोकां खातीर आंग थंड दवरप म्हत्वाचें. घामा वरवीं व्हड प्रमाणांत उदक आनी इलॅक्ट्रॉलायट भायर सरता. बाजारांत तरेकवार थंड पेयां सहज मेळटात तरी तातूंत साकर, रंग आनी रसायनां चड आशिल्ल्यान आनी ते पियेत रावल्यार तांचें भलायकेचेर वायट परणाम जावंक शकतात. देखून सैमीक पर्याय म्हूण जिरें घालून उकळिल्लें उदक पियेल्यार खूब उपेगी पडटा.
उदकांत जिरें उकळून मागीर गाळून वा रातभर जिरें उदकांत भिजोवन गाळटकूच उदक उरता तें जिऱ्या उदक. जिऱ्या उदक मात्शें उश्ण आसता, पूण तें कुडीक थंडसाण दिता. आयुर्वेदाच्या मतान जिरें जरी ‘उश्ण’ गुणधर्मी आसलें तरी ताचें उदक कुडींतल्या दोशांचो समतोल सांबाळून दवरतात. गिमाच्या दिसांनी निर्जलीकरण ही एक सामान्य पूण गंभीर समस्या उप्रासता. तातूंत आशिल्ल्या इलॅक्ट्रॉलायट आनी खनिजां कुडींतल्या उदकाची पातळी समान दवरपाक मजत करतात. गिमाच्या दिसांनी जायत्या जाणांक अपचन, जडपण, वायू, मळमळ अशे प्रस्न उप्रासतात. जिऱ्यांत ‘थायमोल’ नांवाचो घटक आसता, जाका लागून पचन रसाचो स्राव वाडटा. हाका लागून अन्न सहज पचता आनी पोटाची तांक तिगून उरता.
जिऱ्या उदक कुडीची उश्णताय उणी करपाक खूब उपेगी पडटा. खास करून गिमांतल्या दिसांनी खर वतांतल्यान घरांत येतकच पेलो भर जिऱ्या उदक पियेल्यार थकसाण आनी अस्वस्थताय उणी जाता. जिऱ्या उदक कुडींतल्यान विखारी पदार्थ भायर काडपाक आदार करता. हाका लागून कांतीर घामोळें, पुळेर हांचे पसून थाकाय मेळटा. जिऱ्या उदक कांतीच्या समस्यांचेर नियंत्रण दवरता. भूक नियंत्रीत करपाक आदार करता. खाल्ले अन्नातले घटक पचोवपाक मजत करता. सकाळीं रिकाम्या पोटार जिऱ्या उदक घेतल्यार कुडीची चरबी उणी जावपाक आदार जाता. जिऱ्यांत लोखंड, मॅग्नेशियम, पोटॅशियम हीं खनिजां आसतात, जीं रगताचो दाब नियंत्रीत करपाक मजत करतात. गोडेंमूत जाल्ल्या दुयेंतीक हें उदक फायदेशीर आसून ताचो साकरेचे पातळेचेर ताबो उरता. एक चमचो जिरें एक पेलो उदकांत घालचें. हें उदक मध्यम उज्याचेर 5-7 मिणटां उकळून घेवचें. गाळून थंड जातकच पियेवचें.
एक चमचो जिरें एक पेलोभर उदकांत रातभर भिजोवन दवरचें. सकाळीं जिरें गाळून रिकाम्या पोटार पियेवचें. आवडी प्रमाण जाय जाल्यार तातूंत लिंबाचो रोस वा म्होंव घालूं येता. जिऱ्या उदक चडशा लोकांक सुरक्षीत आसता. पूण थोड्यो गजाली लक्षांत दवरप गरजेचें. जिरें चड खावप टाळचें, खास करून गुरवार बायलांनी दोतोराचो सल्लो घेवचो.
दर दिसा 1 -2 पेले जिऱ्या उदक पुरो. जेवणा उपरांत रोखडेंच पियेवचें न्हय. गिमाळ्यांत निरोगी रावप हें एक आव्हान. जिऱ्या उदक हो सादो, सवाय आनी प्रभावी उपाय. ताचो दीसपट्टो वापर कुडीक थंड करपाक, पचनक्रिया सुदारपाक आनी निर्जलीकरणा पसून राखण दिवपाक उपेगी पडटा. आर्विल्ल्या उपाया परस परंपरीक गिन्यान चड टिकावू आनी प्रभावी आसता. देखून ह्या गिमाळ्यांत जिऱ्या उदक तुमच्या नित्यनेमांत आस्पावन घेवचें आनी सैमीक रितीन निरोगी रावचें.
सुदिन वि. कुर्डीकार.
8275425404
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
