भांगरभूंय | प्रतिनिधी
नवी दिल्ली, खबरां संस्था: देशांत परत एक फावट कोरोना आयला. ताजे म्हायती प्रमाण आतां मेरेन देशभर १ हजारां परस चड कोरना दुयेंती आसात. हातूंत ७५२ दुयेतींची फाटल्या पांच- स दिसांत नोंद जाल्या. सध्या सगल्यांत चड कोरोनाची लागवण जाल्ले दुयेंती केरळांत आसात. जाल्यार महाराष्ट्रांत २०९, दिल्लीक १०४, उत्तर प्रदेशांत १५, अस्तंत बंगालांत १२, गुजरातांत ८३ आनी कर्नाटकांत ४७ सक्रीय कोरोना दुयेंती आसात.
दिल्लीक फाटल्या सप्तकांत ९९ कोरोना दुयेंती मेळ्ळ्यात. हाका लागून दिल्ली, मुंबय आनी केरळा सयत देशभर परत कोरोनाचो भंय पातळ्ळा.
मजगतीं, फाटल्या कांय दिसांनी महाराष्ट्रांत चार, केरळांत दोन आनी कर्नाटकांत एक कोरोना दुयेंतींक उपचारा मजगतीं मरण आयिल्ल्याचो दावो कांय प्रसारमाध्यमांनी केला. मात शासकीय पांवड्यार हे वृत्तीची पुश्टी करूंक ना.
महाराष्ट्र, दिल्ली आनी केरळच्या नागरिकांची चिंता वाडिल्ली आसतना कांय राज्यां आनी केंद्राशसीत प्रदेश आजूनय कोरोना पसून चार हात लांब आसात. अंदमान आनी निकोबार बेट, अरुणाचल प्रदेश, आसाम, बिहार, हिमाचल प्रदेश, जम्मू आनी काश्मीरांत आजूनय एकूय कोरोनाचे दुयेंती मेळूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
