भांगरभूंय | प्रतिनिधी
एनडीए शासीत राज्यांच्या मुख्यमंत्र्यांक प्रधानमंत्र्यांचो सल्लो
नवी दिल्ली, खबरां संस्था: प्रधानमंत्री मोदींनी आयतारा दिल्लीक एनडीए शासीत राज्यांच्या मुख्यमंत्री आनी उपमुख्यमंत्र्यां वांगडा बसका घेतली. सुत्रांनी सांगलें, तांणी फुडार्यांक ऑपरेशन सिंदूर आनी संबंदीत मुद्यांचेर भाशण करपा आड शिटकावणी दिली. एनडीटीव्हीच्या सुत्रां प्रमाण, मोदींनी एनडीए फुडार्यांक सांगलें, तांकां दरेका मुद्द्यांचेर उलोवपाची गरज ना. तशेंच गरज नाशिल्लीं विधानां करपाचीय गरज ना.
११ मेक मध्य प्रदेशचे मंत्री विजय शाह हांणी ऑपरेशन सिंदूराचेर पत्रकार परिशद घेवपी कर्नल सोफिया कुरेशी हांकां आतंकवाद्यांची भयण म्हणिल्लें. तांच्या ह्या विधानावेल्यान बरोच वाद निर्माण जाल्लो. उपरांत विजय शाह हांणी एक व्हिडिओ जारी करून माफी मागली.
मात, हें प्रकरण सर्वोच्च न्यायालयांत पावलां. न्यायालयान विजय शाह हांची माफीय भायर मारली आनी म्हणलें, पुराय देशाक मंत्र्यांच्या विधानाची लज दिसता. सर्वोच्च न्यायालयाच्या आदेशा प्रमाण एसआयटी चवकशी सुरू आसा. तशेंच, तांची अटक सध्या स्थगीत केल्या.
विजय शहा हांच्या प्रकरणाचे फाटभूंयेर हरियाणांतले भाजपाचे राज्यसभा खासदार रामचंद्र जांगरा हांणी २४ मेक म्हणिल्लें, ज्या बायलांनी आपले घोव वगडायले तांचे मदीं शौर्याची भावना आनी जोश नाशिल्लो आनी ताका लागूनच २६ लोक गुळयांचे बळी थारले. खासदारान मुखार म्हणलें, पर्यटकांक हात जोडून मारले. जर आमी पंतप्रधानांचे येवजणे प्रमाण प्रशिक्षण घेतिल्ले आनी परिस्थितीक तोंड दिल्लें जाल्यार इतले जीव वच्चे नाशिल्ले.
भाजप खासदाराक तांच्या विधानावेल्यान टिकेक तोंड दिवचें पडलें. उपरांत तांणी आयतारा माफी मागली. राजकी वाद निर्माण करपा खातीर तांच्या विधानाचो विपर्यास केल्ल्याचें तांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
