भांगरभूंय | प्रतिनिधी
भांगरभूंय । प्रतिनिधी
पेडणेः भाजपा सरकारान पेडणेची जी उदरगत केल्ल्या तांची दखल घेवन पेडण्यातल्या सगल्या पंचायत वाठारांतले मतदान भाजप समर्थकांच्या पंगडांक वेंचून दितले असो विस्वास पेडण्याचो भाजप आमदार प्रवीण आर्लेकार हांणे उक्तायला. ज्या कोणे आपले उमेदवारी अर्ज भरल्यात ते आपले अर्ज फाटीं घेवन भाजपा समर्थकांक तेंको दितले अशें तांणी सांगलें.
तोरसे पंचायतीच्या 3 नंबर वॉर्डांतल्यान बिनविरोध वेंचून आयिल्ली आदली सरपंच प्रार्थना मोटे हिका परबीं भेटयले उपरांत ते थळाव्या पत्रकारां कडेन उलयताले. ब्रामपूर पंचायतीच्या वॉर्ड 7तल्यान दीक्षा हळर्णकार बिनविरोध वेंचून आयलां. हे दोनूय वॉर्ड बायलां खातीर राखीव आशिल्ले.
भाजप सरकारान राज्यांत सगळे कडेन उदरगत केल्या. पेडण्यांतल्या दरेका पंचायत वाठारांत भाजप वावुरपी जे तरेन काम करतात ताची दखल घेवन लोक तांकांच वेंचून दितले अशें तांणी सांगलें. उमेदवारी अर्ज फाटीं घेवपाच्या दिसा उपरांत लडतीचें चित्र स्पश्ट जातलें. कांय वॉर्डानी भाजपाचेच समर्थक एकमेकां आड उबे आसात. तातूंतल्या कोणाक तुमचें समर्थन आसतलें अशें विचारलें तेन्ना उमेदवारी अर्ज फाटीं घेतगीर कितें तें दिसून येतलें अशें तांणी सांगलें. प्रवीण आर्लेकाराचो तेंको आशिल्ल्यान आपूण विरोधा विणे वेंचून आयला अशें प्रार्थना मोटे हिणे आपल्या निवडी विशीं उलयतना सांगलें.
मजगतीं, उमेदवारी अर्जाचें छाननींत पेडणे तालुक्यांत सगळे उमेदवारी अर्ज सारके आसात अशें दिसून आयलां. तालुक्यांतल्या 17 ग्रामपंचायतींच्या वेंचणुके खातीर 515 उमेदवारी अर्ज आयल्यात. तालुक्यांत तीन उमेदवार बिनविरोध वेंचून आयल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
