भांगरभूंय | प्रतिनिधी
केरळांतल्यान गोंयचे दिशेन वाटचाल
दोन दिसांनी गोंयांत पावपाची शक्यताय
आयज सावन चार दीस ऑरेंज अलर्ट
भांगरभूंय । प्रतिनिधी
पणजी : सरकारी पांवड्यार गोंयांतली मॉन्सुनपूर्व कामां अजून पुराय जावपाचीं आसात. कांय कडेन तीं अजून सुरू लेगीत जावंक नात. कांय जाणांची घरां शिंवपाचीं उरल्यात, जाल्यार कांय जाणांचो अजून पुरुमेंत करपाचो उरला. मॉन्सुनपूर्व पावसान आदींच गोंयाक झोड दिला. हे फाटभुंयेर मॉन्सून खंयच्याय खिणाक गोंयांत पावपाची शक्यताय आसा. मॉन्सून हुमऱ्यार पाविल्ल्यान अंदूं गोंयकारांक पावसाळ्यां आदलीं कामां पुराय करपाक संद मेळची ना, अशी शक्यताय दिसता.
फाटल्या मंगळारा सावन गोंयांत मॉन्सुनपूर्व पावसाचें धुमशेण चालू आसा. अशे स्थितींत शेनवाराच मॉन्सून केरळांत दाखल जाला, अशें हवामान विभागान जाहीर केलां. हेरशी मॉन्सून सादारपणान 1 जूनाक केरळांत पावता. पूण अंदूं मात 8 दीस आदींच ताणें केरळांत हाजेरी लायल्या. हे आदीं 2009 त 23 मेक मॉन्सून केरळांत पाविल्लो. ते उपरांत 16 वर्सांनी ताणें इतले बेगीन केरळांत हाजेरी लायल्या. केरळांतल्यान मॉन्सूनाची वाटचाल कर्नाटक, तामीळनाडू, गोंयचे दिशेन सुरू आसा. हवामानांतल्या बदलांक लागून तो आडकून उरलो ना जाल्यार फुडल्या एक – दोन दिसांनी तो गोंयांत पावपाची शक्यताय आसा.
हवामान विभागान हे आदीं मॉन्सून केरळांत 27 मेक दाखल जातलो, असो अदमास उक्तायल्लो. मात अरबी दर्यांत तयार जाल्लो उण्या दाबाचो पट्टो, तशेंच बंगालचे खाडींत वातावरणीय बदलांक लागून मॉन्सुनाची गती वाडली. मॉन्सुनान 23 मेक श्रीलंकेंत हाजेरी लायिल्ली. ते उपरांत एकाच दिसान तो पुराय केरळ, तामीळनाडूचो चडसो भाग, कर्नाटकाचो दर्यादेग वाठार तशेंच मिझोरमाच्या कांय वाठारांनी पावला, अशी म्हायती हवामान विभागान दिल्या. केरळांतल्लया 14 हवामान केंद्रांनी 10 मे उपरांत सेगीत दोन दीस 2.5 मिमि पावसाची नोंद जाल्यार तशेंच वाऱ्याची थारावीक गती कायम उरल्यार मॉन्सून केरळांत दाखल जाल्ल्याची अधिकृत घोशणा करतात. मजगतीं, हवामान खात्यान गोंयांत शेनवारा नेटाच्या उटंगाराच्या पावसाची शक्यताय उक्तावन रॅड अलर्ट जारी केल्लो, पूण चडश्या वाठारांनी मध्यम स्वरुपाच्या पावसाची नोंद जाली. 25 ते 28 मे मेरेन उटंगाराच्या पावसाची शक्यताय आशिल्ल्यान ह्या चार दिसां खातीर ऑरेंज अलर्ट जारी केला. 29 आनी 30 मेक यलो अलर्ट दिला.
चडांत चड तापमान देंवलें
पावसाक लागून गोंयांतलें चडांत चड तापमान खूब प्रमाणांत देंवलां. शेनवारा पणजे चडांत चड तापमान 29.4, जाल्यार उण्यांत उणें तापमान 25 अंश डिग्री सेल्सियस तापमानाची नोंद जाल्या. मुरगांवां चडांत चड तापमान 28.2 जाल्यार उण्यांत उणें तापमान 25.2 अंश डिग्री सेल्सियस आशिल्लें. पुडले स दीस गोंयांत चडांत चड तापमान 28, जाल्यार उण्यांत उणें तापमान 25 अंश डिग्री सेल्सियस आसपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
