भांगरभूंय | प्रतिनिधी
मुख्यमंत्री : नीती आयोगाचे बसकेंत म्हायती
भांगरभूंय । प्रतिनिधी
पणजी : प्रधानमंत्री नरेंद्र मोदी हांचें ‘विकसीत भारत- 2047’ चें सपन पुराय करचे खातीर केंद्र सरकाराचे मजतीन गोंयची सर्वांगी उदरगत सादपाक गोंय सरकारान प्राधान्य दिलां. 2047 मेरेन गोंयाक सगळेच बाबतींत विकसीत करचे खातीर पांच स्तंभांचेर आदारीत दस्तावेज तयार करपाचें काम लेगीत सुरू केलां, अशें मुख्यमंत्री डॉ. प्रमोद सावंत हांणी स्पश्ट केलें.
प्रधानमंत्री मोदी हांचे अध्यक्षते खाला शेनवारा नवी दिल्लींत नीती आयोगाची बसका जाली. हे बसकेंत मुख्यमंत्री डॉ. सावंत हांचे सयत हेर राज्यांचे मुख्यमंत्री उपस्थीत आशिल्ले. बसकेंत उलयतना मुख्यमंत्री डॉ. सावंत हांणी विवीध मळा वयले गोंयचे उदरगतीचो नियाळ घेतलो.
‘विकसीत भारत- 2047’ चें सपन साकार करचे खातीर गोंयाक लेगीत 2047 मेरेन विकसीत करप गरजेचें आसा. ते खातीर भौतीक, अर्थीक, समाजीक, संस्थागत आनी पर्यावरणीय अश्या पांच मळांनी मुळाव्यो सुविधा उबारचे खातीर दस्तावेज तयार करपाचें काम सरकारान हातांत घेतलां, अशें मुख्यमंत्र्यान सांगलें.
गोंयची अर्थवेवस्था 9.17 टक्के दरान वाडटा, दरडोई उत्पन्न राष्ट्रीय सरासरीच्या लागसार 2.5 पटींनी आसा. गोंयचो एसजीडीएसजी शाश्वत उदरगतीचो संमीश्र स्कोर 2018 त 64 वयल्यान 2024 त 77 मेरेन वाडला. गोंयची ही उदरगत ‘विकसीत भारत- 2047’ च्या दिश्टीकोना कडेन सुसंगत आसा. गोंयान राज्य अमृत काल कृशी धोरण जाहीर केलें. शेतीचें आधुनिकीकरण, शाश्वतता वाडोवप आनी शेतकारांची समृद्धी सुनिश्चीत करपाचे नदरेन हें धोरण म्हत्वाचें आसा. नव्या शिक्षणीक धोरणाची (एनईपी) गोंयांत प्रभावी तरेन अंमलबजावणी करपाक सुरवात जाल्या. भलायकी मळार गोंयान व्हड प्रमाणांत साधनसुविधा उबारल्यात. ‘क्षयरोग मुक्त भारत’ अभियानाक गती दिल्या. दोन पंचायतींक आदींच क्षयरोग मुक्त घोशीत केल्यात, अशें मुख्यमंत्र्यान सांगलें. मजगतीं, कृशी, नुस्तें उद्दोग, पर्यावरण, पर्यटन, मुळावे प्रकल्प ह्या सारक्या विवीध मळांचेर गोंयान केल्ले उदरगतीचो मुख्यमंत्र्यान सविस्तर नियाळ घेतलो.
प्लास्टिकाचेर जैत जोडपाक ‘डीआरएस’ येवजण
प्लास्टीक कोयराचेर जैत जोडपा खातीर गोंयांत एप्रील 2026 सावन ठेव परतावो येवजण (डीआरएस) सुरू करतले. अशी येवजण चालीक लावपी गोंय भारतांतलें पयलें राज्य थारतलें. सिस्टीम ऑपरेटरांचे निवडी खातीर ई-निविदा जारी केल्या, अशेंय मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
