भांगरभूंय | प्रतिनिधी
मडगांव : मडगांव शारांतल्या गांधी मार्केटा लागसार आशिल्ले धोक्याचे इमारतीचो एक भाग शुक्रारा दनपारां कोसळिल्लो. शेनवारा सकाळीं सिने लता वाठारांतले आनीक एके इमारतीचो भाग कोसळ्ळो. हातूंत कसलेंच लुकसाण जालें ना, कोणाक दुखापत जावंक ना. पूण कसलीय वायट घडणूक घडचे पयलीं पोरणें इमारतीं संबंदांत ठोस उपाय करचे, अशी मागणी लोकांनी केल्या.
मडगांवांतल्या पोरण्यां आनी धोक्याच्या इमारतींचो प्रस्न परतून एक फावट चर्चेंत आयला. शेनवारा सकाळीं मडगांवां पालिका इमारती फाटल्यान आशिल्ल्या सिने लता वाठारांतले पोरणे आंताव इमारतीचे बाल्कनीचो एक भाग कोसळ्ळो. ही दुर्घटणा सकाळच्या वेळार जाल्ल्यान कोणाक दुखापत जावंक ना आनी कसलेंच लुकसाण जावंक ना. पूण तेच इमारतींत जायतीं दुकानां चलतात. जायते गिरायक थंय खरेदी करपाक येतात. अशे परिस्थितींत इमारतीचो आनीक कांय भाग कोसळ्ळो जाल्यार वायट घडणूक घडूंक शकता. ताका लागून अश्या इमारतीं विशीं उपाय काडून बेगोबेग निर्णय घेवपाची गरज आसा. मडगांवचे हे घडणुके उपरांत येरादारी पुलिसांनी हो रस्तो येरादारी खातीर बंद केलां. तशेंच मडगांवचे पुलीस निरिक्षक सूरज सामंत हांणी घडणूक सुवातेर वचून सुरक्षे खातीर कारवाय सुरू केली. वीज खात्याच्या कर्मचाऱ्यांनी धोक्याचे वीज लायनींची वीज पुरवण बंद केल्या. मजगतीं, पालिका कामगारांनी पडिल्ल्या स्लॅबाचे कुडके एकठांय करून ते कुशीक काडपाचें काम सुरू केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
