भांगरभूंय | प्रतिनिधी
पणजी : सरकारी पांवड्यार जावपी सांजांव, चिखल कावोस दिपोत्सवा खातीर पर्यटन खात्यान 3.39 कोटीं रुपयांची निविदा काडल्या. तातूंत सांजांवाच्या आयोजना खातीर 90 लाख रुपया, चिखल काल्याच्या आयोजना खातीर 1 कोटी 49 लाख जाल्यार दिपोत्सवाच्या आयोजना खातीर 1 कोटी रुपयांचे निविदेचो आस्पाव आसा.
सरकारी पांवड्या वयलो सांजांव 24 जूनाक, चिखल कालो जुलयाच्या दुसऱ्या वा तिसऱ्या सप्तकांत जाल्यार दिपोत्सव ऑक्टोबरांत मनयतले. पर्यटन खात्यान काडिल्ली निविदा ही आरएफक्यू स्वरुपाची आसा. एजन्सीचो प्रस्ताव आवडलो जाल्यारूच फुडली निविदा काडटले. सांजांव महोत्सव शिवोली वा हेर वाठारांत जातलो. महोत्सव 24 जूनाक सकाळीं 10 ते रातच्या 10 वरां मेरेन चलतलो. कार्यावळांत सांजांवा बगर गोंयची संस्कृती दाखोवपी नाच प्रकार, गितां, खाद्य पदार्थ, थळावीं पेयां उपलब्ध करून दितले. तशेंच थंय हस्तकला आनी कृशी विभाग, कार्यशाळा आनी मास्टर क्लास, प्रात्यक्षिका अश्या विवीध घटकांचो आस्पाव आसतलो.
चिखल कालो महोत्सव सादारण जुलयांत दोन दीस मनयतले. हे विशींची निमाणी तारीख बेगिनूच जाहीर करतले. हो महोत्सव माशेलांतल्या मैदानार वा हेर वाठारांत जातलो. ह्या महोत्सवांत लेगीत थळाव्या कलाकारांच्यो कार्यावळी जातल्यो. तशेंच गोंयची संस्कृती दाखोवपी नाच प्रकार, थळावे खाद्य पदार्थ, थळावीं पेयां उपलब्ध आसतलीं. दिपोत्सव ऑक्टोबरांत प्राधान्यान पर्वरे आयोजीत करतले. कार्यावळीचे सुवातेर आकाश दिव्यांची सजावट करची पडटली. हे मजगतीं तीन दीस सांस्कृतीक कार्यावळींचें आयोजन करतले. तातूंत परंपरीक गोंयच्या नाचांचो आस्पाव आसतलो. तिसऱ्या दिसा रातच्या 10 वरां उपरांत नरकासूर सर्त सुरू जातली. फांतोडेर 4 ते 5.30 वरां मेरेन नरकासूराची प्रतिमा लासतले. हे सर्ती खातीर सुमार 10 लाखांची इनामां आसतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
