भांगरभूंय | प्रतिनिधी
पणजी ः शेनवारा मान्सून पुराय केरळ सयत तमिळनाडू आनी कर्नाटकाच्या दर्यादेगेवेल्या वाठारांनी दाखल जालो. हाका लागून पावस गोंयचे शिमेलागीं पावला. हवामान अनुकूल आसल्यार फुडल्या 2 ते 3 दिसांनी मान्सून गोंयांत प्रवेश करपाची शक्यताय आसा. सादारणपणान 1 जून दिसा पावस केरळांत प्रवेश करता.अंदूं आठ दीस आदीं पावसान केरळांत प्रवेश केला. ताचे आदीं 2009 वर्सा 23 मे दिसा केरळांत पावस पाविल्लो.
हवामान खात्यान हाचे पयलीं मान्सून केरळांत 27 मे दिसा पावतलो असो अदमास काडिल्लो. पूण अरबी दर्यांत तयार जाल्ल्या उण्या दाबाच्या पट्ट्याक लागून आनी बंगालच्या खाडींतल्या हवामानांत बदल जाल्ल्यान पावस ताचे पयलींच आयलो. 23 मे दिसा मान्सून श्रीलंकेक पावलो. हाचे उपरांत फकत एकाच दिसा म्हळ्यार २४ मे दिसा पुराय केरळ, तमिळनाडूचो चडसो वाठार, कर्नाटकाचो दर्यादेग वाठार आनी मिझोरामाच्या कांय वाठारांनी पावसान पयलींच हाजेरी लायली.
केरळांतल्या 14 हवामान केंद्रांचेर 10 मे उपरांत लेगीत दोन दीस 2.5 मिलिमीटर पावसाची नोंद जाल्यार वा वाऱ्याची थारायल्ली गती कायम उरल्यार मान्सून केरळांत दाखल जाल्ल्याची अधिकृत घोशणा जाता. मजगतीं, हवामान खात्यान आयज गोंयांत उटंगाराच्या पावसाचो रेड अलर्ट जारी केलां. तशेंच 25 ते 28 मे ह्या काळांत व्हड प्रमाणांत पावस पडपाची शक्यताय उक्तायल्या आनी ह्या चार दिसां खातीर ऑरेंज अलर्ट जारी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
