भांगरभूंय | प्रतिनिधी
ओटावा, खबरां संस्था ः कॅनडान आंतरराष्ट्रीय विद्यार्थ्यांक दिवपी अभ्यास परवान्यांचो आंकडो उणो केला. 2025 वर्साच्या पयल्या तिमाहींत फाटल्या वर्साच्या ह्याच काळा परस भारतीय विद्यार्थ्यांक दिल्ल्या परवान्यांत 31 टक्क्यांनी उणाव आयला.
इमिग्रेशन, रिफ्युजीज अँड सिटीजनशिप कॅनडा (IRCC) च्या आंकडेवारी प्रमाण जानेवारी ते मार्च 2025 ह्या काळांत फकत 30,640 विद्यार्थ्यांक अभ्यास परवाने जारी केल्ले, जाल्यार 2024 वर्सा ह्याच काळांत 44,295 विद्यार्थ्यांक अभ्यास परवाने जारी केल्ले.
जानेवारी 2025त कॅनडाची लोकसंख्या 41.5 दशलक्ष आशिल्ली, तातूंतले 3.2 कोटी तात्पुरते रावपी आशिल्ले. हें सुमार 7.25% आसा. कॅनडा सरकाराचो हेत आसा की हें प्रमाण 2028 मेरेन 5% परस उणें करप. हाकाच लागून आयआरसीसीन 2025 वर्सा खातीर अभ्यास परवान्याची मर्यादा 4,37,000 मेरेन वाडयल्या, जी 2024 वर्सा परस 10% उणी आसा. ही मर्यादा 2026 मेरेन लागू उरतली.
आंतरराष्ट्रीय विद्यार्थ्यां मदीं 40% उणाव
कॅनडान 2023 वर्सा सावन आंतरराष्ट्रीय विद्यार्थ्यांचो आंकडो उणो करपाचो यत्न सुरू केल्लो. 2023 वर्सा कॅनडान वट्ट 6.81 लाख अभ्यास परवाने जारी केल्ले, तातूंतले 2.78 लाख भारतीय विद्यार्थ्यां खातीर आशिल्ले. 2024 वर्सा वट्ट परवान्यांचो आंकडो 5.16 लाख मेरेन देंवलो, तातूंतले 1.88 लाख भारतीय विद्यार्थी आशिल्ले. हाका लागून कॅनडाक येवपी आंतरराष्ट्रीय विद्यार्थ्यांचो आंकडो सुमार 40% उणो जालो.
कॅनडांत वचप कठीण
कॅनडा दोन गटांनी परवाने जारी करतले. जाचे खातीर प्रांतीय सत्यापन पत्र (PAL) वा प्रादेशिक सत्यापन पत्र (TAL) सादर करचें पडटलें. कॅनडा सरकारान अभ्यास परवानो अर्ज करपा खातीर जायते नवे नेम चालीक लायल्यात. जाका लागून आंतरराष्ट्रीय विद्यार्थ्यां खातीर अर्ज करपाची प्रक्रिया चड कडक जाल्या.
० संपत्तीचो पुरावोः 1 जानेवारी 2024 सावन अर्जदारांक तांचे कडेन सुमार 12.7 लाख रुपया आसात हें सिद्ध करचें पडटलें.
० स्वीकृती पत्राची पडताळणी: डिसेंबर 2023 सावन, नियुक्त शिक्षण संस्थांनी (DLIs) दरेका अर्जदाराचें स्वीकृती पत्राची IRCC कडल्यान सत्यापीत करचें पडटलें.
० शाळा बदलपा खातीर नवे नेम: 1 मे 2025 सावन आंतरराष्ट्रीय विद्यार्थ्यांक शाळा बदलपा खातीर नवो अभ्यास परवानो घेवचो पडटलो.
० वर्क परमिट आनी हेर धोरणां: अर्जदारांक अभ्यास परवानो सोंपतकच कॅनडा सोडटले हेंय सिध्द करचें पडटलें.
ह्या खर नेमांक लागून कॅनडांत शिकपाक सोदपी भारतीय विद्यार्थ्यांचो आंकडो उणो जाला. आयडीपी एज्युकेशनान मार्च 2025 वर्सा केल्ल्या सर्वेक्षणांतल्यान दिसून आयलां, आतां भारतीय विद्यार्थ्यां खातीर कॅनडा ही पयली निवड ना. फकत 13% विद्यार्थ्यांक कॅनडांत शिकपाची इत्सा आसा, जाल्यार 2024 वर्सा हो आंकडो 19% आसलो.ऑस्ट्रेलिया (28%) आनी अमेरिकेंत (22%) लोकप्रियता वाडल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
