भांगरभूंय | प्रतिनिधी
सद्याचे जिणे पद्दतीक लागून आनी ताणांतल्यान जायत्या जाणांक तकली दुखता. चड काळ तकली दुखपा पसून मुक्त रावपा खातीर सादे उपाय घेवप म्हत्वाचें. तकली दुखता तेन्ना जिवीत थांबता अशें दिसता. रोखडीच सुटका मेळोवपा खातीर आमी बेगीन वखदां घेतात. पूण अशा वखदांचो सतत वापर केल्ल्यान दीर्घ काळांत कुडीचेर वायट परिणाम जावंक शकतात. देखूनच तकली दुखप आडावपाचे आनी उणे करपाचे सादे मार्ग जाणून घेवप म्हत्वाचें. आयुर्वेदांत ह्या समस्याच्या मुळाक उपचार केला.
तकली कित्याक दुखता?
तकली दुखप ल्हान वा खर आसूं येता. ताचे कडेन दुर्लक्ष करपा सारकें न्हय. हो वेगळो रोग न्हय तर हेर भलायकी समस्यांची शिटकावणी दिवपी लक्षण. आयुर्वेदाच्या मतान हाका जायतीं कारणां आसात. उदक उणें घेवप, पचन तंत्रांत त्रास जावप, ताण, तेलकट, तिखट आनी खूब मीठ आशिल्लें अन्न चड प्रमाणांत खावप, अनियमित आहार हांकां लागून तकली दुखूंक शकता. सायनस हेंय एक म्हत्वाचें कारण. देखून निरोगी जिणे खातीर तकली दुखप उणें करप वा टाळप गरजेचें.
तकली दुखप नियंत्रीत करपाक भरपूर उदक पियेवचें. नाल्लाचें उदक, तुळशी च्या, आनी ताजे फळांचे रोस तुमच्या आहारांत आसपावीत करात. तुमच्या आहारांत काळींग, चिबूड, गोड दूद, तूप, आपोल, तवशें वापरात. आलें, पुदीना, कोथमिरी, आलू, जिरें, वेलची सारकिल्ल्यो वनस्पती घुंवळ येवप आनी पोटांत धवळप हाचेर फायदेशीर आसतात.
योग, प्राणायाम, ध्यान, ताण उणो करून मन शांत दवरतात. चंदन, पुदीना, निलगिरी, लॅव्हेंडर सारकिले सुगंधी तेल वापरात. तेलान तकलेक मालिश केल्यार रगत बरें घोळटा आनी तकली शांत उरता. थंड उदकाचो शेक करचो. तशेंच वेळार न्हीद घेवप गरजेचें. मोबायल पळयत बसूं नाकात.
कांय सप्लिमेंट्स तकली दुखप उणें करपाक उपेगी पडटात. बी १२ जीवनसत्व तकली दुखपा पसून सुटका दिता. मॅग्नेशियम, ओमेगा-3 फॅटी अॅसिड, आनी व्हिटॅमिन डी पूरक पदार्थ घेवंक मेळटात. पूण ते खातीर दोतोराचो सल्लो घेवप गरजेचें. दोतोराच्या सल्ल्या बगर अशे पूरक पदार्थ घेवप हानीकारक थारूंक शकता.
तकली दुखपी गजालीं पासून पयस रावप म्हत्वाचें. सिगरेट, सोरो, कॉफी, जंक फूड टाळचें. ताण निर्माण करपी गजाली वळखून तांचे पासून पयस रावचें. अनियमीत आहार आनी कामाचो वेळ टाळचो. तकली दुखप वेळोवेळ अपरिहार्य आसता, पूण ह्यो साद्यो आयुर्वेदीक टिप्स पाळ्ळ्यार ती परत परत येवपी समस्या थारची न्हय हाची जनताय घेवपाक मेळटली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
