भांगरभूंय | प्रतिनिधी
अस्तंत बंगालांतल्या एकल्याक अटक: पर्वरी पुलीस तपास करतात
पणजी : पूर्व प्राथमीक ते उच्च माध्यमीक शिक्षणाक मजत करपा खातीर केंद्र सरकारान सुरू केल्ल्या समग्र शिक्षा अभियानाच्या गोंयच्या बँक खात्यांत वट्ट ५ कोटींची भानगड जाल्या. ह्या प्रकरणाचो पर्वरे पुलीस तपास करतात. हातूंत अभियानाचे अधिकारी वा कर्मचार्यांचो आसपाव आशिल्ल्याचें उक्तें जाल्यार तांकां सोमतेच घरा धाडटले, अशें एका सुत्रान सांगलें.
अभियानाच्या गोयच्या बँक खात्यांत फाटल्या कांय वर्सां सावन ५ कोटींची भानगड जाल्ल्याचें मुखार आयले उपरांत राज्याच्या शिक्षणीक मळार बरोच बोवाळ जाला.
अस्तंत बंगालांतल्या एके राष्ट्रीयीकृत बँकेंत समग्र शिक्षा अभियानाचे खातें आसा. ह्या खात्यांतल्या निधी वैयक्तीक खात्यांत गेल्ल्याचें लक्षांत आयले उपरांत गोवा सर्व शिक्षा अभियानान ह्या प्रकरणाची चवकशी करपाक सुरू केली. अभियानाचे प्रकल्प संचालक डॉ. शंभू घाडी हांणी पर्वरी पुलिशेंत कागाळ दाखल केली. ते प्रमाण पुलिसांनी अस्तंत बंगालचे कपडे वेवसायीक रॉबिन पॉल (४१) हाका अटक केली. ताणें दिल्ले म्हायती प्रमाण, एका मनशान ताका रीण दिवपाचें आस्वासन दिलें. मात ताचें वैयक्तीक बँक खातें स्वताक वापरपाक दिवचें अशी मागणी केली. त्या बँक खात्यांत गोवा समग्र शिक्षा अभियानाच्या नांवाचेर दोन कोटी जमा केले. कोविडच्या आदीं सावन आपल्याक कसलीच म्हायती नासतना आपल्या खात्याचो बेकायदेशीरपणान वापर जालो आनी आपल्या खात्यांतल्यान संबंदीत मनशान पयशे दुसरे कडेन वळयिल्ल्याचेंय तांणी स्पश्ट केलें.
मजगतीं, हे भानगडींत गोवा सर्व शिक्षा अभियानाचो कोण अधिकारी, कर्मचारी गुंथला काय? हाचो सोद पुलिसांनी घेतला. शिक्षण खात्याच्या एका वरिश्ठ अधिकार्यान दिल्ले म्हायती प्रमाण, हातूंत गोवा सर्व शिक्षा अभियानाचे बोगस धनादेशूय तयार केल्ले. ताचेर शंभू घाडी आनी अभियानच्या लेखा विभागाच्यो नकली सयो आसात. गोवा सर्व शिक्षा अभियानाच्या खात्याची पुराय म्हायती संबंदीत बँके कडेंच आशिल्ल्यान बँकेच्या अधिकार्यां कडल्यान ही भानगड जावपाक शकता, असो दुबाव अभियानाच्या गोंयांतल्या अधिकाऱ्यांक आशिल्ल्याचेंय ह्या अधिकार्यान स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
