भांगरभूंय | प्रतिनिधी
गोंयांत आयज ऑरेंज अलर्ट
नवी दिल्ली: हवामान खात्यान शुक्रारा देशांतल्या २८ राज्यांनी वादळ आनी पावसाची शिटकावणी जारी केल्या. हिमाचल प्रदेशांत गारगोटीचो शिटकावणी दिल्या. तेन्नाच मध्य प्रदेश आनी राजस्थाना सयत १२ राज्यांनी उश्टतायेच्या ल्हारा विशीं अलर्ट जारी केला.
मजगतीं, गोंयांत सेगीत चार दीस जाले पावस झडत आसा. ह्या पावसाक लागून पडझड जाल्ल्यान बरेंच लुकसाणूय जालां. हवामान खात्यान फुडलें सप्तकभर पावस उरतलो. तशेंच आयज ऑरेंज अलर्ट जारी केला.
जाल्यार राजस्थानांतल्या १९ जिल्ह्यांनी वादळ आनी पावसाचो येलो अलर्ट आसा. तशेंच, राज्यांच्या पश्चीमे कडल्यान जिल्ह्यांनी वादळाची शिटकावणी दिल्या. तीन शारांनी उश्णतायेच्या ल्हाराचो रेड अलर्ट दिला. तशेंच एका जिल्ह्यांत ऑरेंज आनी १२ जिल्ह्यांनी येलो अलर्ट दिला.
फाटले दोन दीस वादळ आनी पावसा कडेन संबंदीत घडणुकांक लागून उत्तर प्रदेशांत ५८ आनी राजस्थानांत दोगांक मरण आयलें. उत्तर प्रदेशांतल्या ६४ जिल्ह्यांनी वादळ आनी घोग्यांनी पावस पडलो. गोरखपूरांत सगल्यांत चड ७४ मिमी पावस पडलो. नोएडांत ८० किमी प्रती वर वेगान वारें व्हांवतालें.
तेन्नाच, मध्य प्रदेशांतल्या खुबश्या जिल्ह्यांनी सांजेवेळार उसरां हवामान इबाडलें. वादळ आनी पावसाक लागून भोपाळ, इंदूर आनी रायसेनांत खुबशीं झाडां हुमटून पडलीं. फुडले कांय दीस हांगा अशेंच हवामान उरपाक शकता.
शुक्रारा नाशिक, संभाजीनगर, पुणे, अहिल्यानगर हांगा येलो अलर्ट दिलो. कोकणांत फुडले दोन दीस घोग्यांनी पावस आसतलो. पुण्याक आनी सातारा वाठारांतलो पावस २४ मे सावन उणो जातलो, जाल्यार सिंधुदुर्गांत २६ मे मेरेन पावस आसतलो. हवामानतज्ज्ञ डॉ. अनुपम कश्यपी हांणी सांगलें, मे म्हयन्याच्या निमाणे कडेन मान्सून मुंबय, पुण्यांत येवपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
