भांगरभूंय | प्रतिनिधी
मुंबय, खबरां संस्था: गौरी- गणपतीच्या दिसांत कोकणांत, गोंयांत वतल्यांचो आंकडो बरोच व्हड आसता. लोकांचो आंकडो पळयल्यार जायते फावट रेल्वेची तिकेटूय मेळना. हाका लागून प्रवाशांक रस्तो मार्गान प्रवास करचो पडटा. मात मुंबय- गोंय महामार्गाचें काम बरींच वर्सां आडकून पडलां. अशा वेळार रस्तो मार्गान प्रवास करप म्हणल्यार फोंडकुलांचो चड त्रास. येरादारी कोयंडीक लागून कितलींशींच वरां आडकून रावचें पडटा. लोकांची गर्दी आडावपा खातीर बेगीनूच प्रवासाचो नवो मार्ग उक्तो जातलो. ह्या नव्या प्रवासी मार्गाक लागून नागरीक फकत चार वरांनी कोकणाक पावतले.
गणपतीक कोकणांत वचप्यां खातीर एक बरी खबर आसा. तांकां आतां दर्यांतल्या मार्गांतल्यान प्रवास करपाक मेळटलो. उण्या वेळांत गांवांत पावचे खातीर नुस्तें आनी बंदारे विकासमंत्री नितेश राणे हांणी विशेश फुडाकार घेतला. हाका लागून वट्ट साडेचार वरांनी मालवण, विजयदुर्ग जाल्यार तीन वरांनी रत्नागिरी पावतले. मुंबयच्या माझगाव सावन मालवण, विजयदुर्ग, रत्नागिरी मेरेन जल येरादारी सेवा सुरू जातली. हायटेक यंत्रणां आशिल्ले एम² टू एम² हे बोटी वरवीं कोकणांत प्रवास करपाक मेळटलो.
एम टू एम बोट २५ मे सावन मुंबयचो ‘भाऊचा धक्का’ हांगा दाखल जातली. मंत्री नितेश राणे हांचे संकल्पनेंतल्यान परवडपी दरांत जलयेरादारीचो नवो पर्याय उपलब्ध करुन दितात. हाका लागून करता एम टू एम बोट सेवा प्रायोगीक तत्वाचेर सुरू करपाचें नियोजन केलां. अत्याधुनीक तंत्रज्ञाना वरवीं हायटेक यंत्रणां आशिल्ल्या एम टू एम या बोटी वरवीं जल येरादारी सुरू करपाचो यत्न आसा.
मुंबयच्या माझगांव डॉकाच्यान प्रवास सुरू जातलो. सुमार साडेचार वरांनी कोकणांतल्या मालवण, विजयदुर्ग, जाल्यार तीन वरांनी रत्नागिरी मेरेन पावपाक मेळटलें. बेगीनूच ह्या सागरी प्रवासाची तिकीट दर निश्चीत करतले. परवडटलें अशें दर निश्चीत करतलें.
कशेडी बोगदो सुरू
मुंबय- गोंय महामार्गावेलो कशेडी घांटावेल्या दुसर्या बोगद्यांत १५ मेक वीजपुरवण सुरू जाल्ल्यान तो पुराय तांकीन येरादारी खातीर उक्तो जाला. हाका लागून कोकणांत वचप्यांचो प्रवास आनीक वेगान जााला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
