भांगरभूंय | प्रतिनिधी
पणजी: कोंकणी वावुरपी अँथनी वाझ हांकां २०२४ वर्साचो मोहिनी स्मृती पुरस्कार जाहीर जाला. साहित्यीक आनी सुटके झुजारी सर्गेस्त नागेश करमली हांचे घरकान्नीच्या उगडासान कोंकणी भाशा, साहित्य, चळवळ, शिक्षण अश्या साबार मळांचेर निश्ठेन वावर केल्ल्या कोंकणी फुडार्यांक हो पुरस्कार भेटयतात.
अँथनी हांणी कोंकणी नाट्य मळार वावर केला. गोंय तशेंच मुंबयंत तांणी १५ परस चड तियात्रांनी काम केलां. तशेंच कोंकणी नाटकांनी आनी चलचित्रांनी अभिनय केला. कोंकणी राजभास जावची म्हणून जाल्ले ५५५ दिसांचे राजभास चळवळींत तांणी सक्रीय वांटो घेतला. साहित्याच्या मळार तांणी ‘सुख आनी दुख’ आनी ‘कीड’ हीं दोन तियात्रां बरयल्यांत तशेंच ‘राखणो’ ही कादंबरी रचल्या. तांकां एकांकिका, कविता बरोवपाचीय आवड आसा.
लोककलेचो प्रसार करपा खातीर तांणी नीज कला केंद्र संस्था स्थापन करून गोंयभर कोंकणी लोककलेच्यो कार्यावळी घडोवन हाडल्यो. कोंकणी भाशा मंडळ, कला अकादमी गोवा ह्या संस्थां खातीर तांणी वावर केला. तांकां लाभिल्ल्या पुरस्कारा मदीं कोंकणी भाशा मंडळाचो पुरस्कार, कोंकणी भाशा सेवा सन्मानाचो आसपाव आसा.
नागेश करमली हांच्या घरच्यांनी दवरिल्लो हो मोहिनी स्मृती पुरस्कार भेटोवपाची कार्यावळ बेगिनूच घडोवन हाडटले अशें आयोजक संजना पब्लिकेशन्साचे दिनेश मणेरकार हांणी सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
