भांगरभूंय | प्रतिनिधी
पणजी : धारबांदोडा पंचायत वाठारांतलो स्पीडब्रेकर काडपाक विरोध करताना सरपंचांनी मानवाधिकार आयोगाकडेन कागाळ केल्या. हे कागाळीची दखल घेवन आयोगान भौशीक बांदकाम खात्याच्या प्रधान मुखेल अभियंत्यांक नोटीस जारी केली. सुनावणेक प्रत्यक्षांत हजर रावन वा प्रतिनिधी वरवीं स्पश्टीकरण दिवपाचे आदेश आयोगान जारी केल्यात.
गोवा मानवाधिकार आयोगाचे अध्यक्ष डेस्मंड डिकोस्ता आनी वांगडी प्रमोद कामत हांणी हो आदेश जारी केला. कागाळेचेर २४ जुनाक सकाळीं १०.३० वरांचेर सुनावणी जातली.
धारबांदोडेंच्या रस्त्यांचेर १५ वर्सां पयलीं स्पिडब्रेकर घातिल्ले. वाहनांचो वाडपी आंक़डो आनी अपघातांचो धोको लक्षांत घेतल्या, हे सिपडब्रेकर गरजे आसात. हांची गरज आसूनय बांदकाम खात्यान स्पिडब्रेकर काडपाची प्रक्रिया सुरू केल्ल्याचें सरपंच विनायक गांवस हांणी कागाळेंत म्हणलां. पंचायत वा थळाव्यांक विस्वासांत घेनासतना स्पिडब्रेकर काडपाचे यत्न सुरू आसात. चलत वचपी तशेंच वाहनचालकांच्या सुरक्षीतताये खातीर स्पिडब्रेकर आसप गरजेचें. मानवाधिकार आयोगान हस्तक्षेप करून योग्य ते आदेश दिवचे, अशी मागणी धारबांदोडेंच्या सरपंचांनी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
