कोरोना परत आयलो

भांगरभूंय | प्रतिनिधी

गुजरातांत 7 नवे कोरोना दुयेंती, देशांतल्या दुयेंतींचो आंकडो 257

नवी दिल्ली, खबरां संस्था ः कोरोना व्हायरसाचे दुयेंती परत एक फावट वाडत आसात. गुजरातांतल्या अहमदाबादांत 7 नवे कोविड पॉझिटिव्ह दुयेंती मेळ्ळ्यात. तातूंत 2 वर्सां पिरायेची चली आनी 72 वर्सां पिरायेचो दादल्याचो आस्पाव आसा. तांकां सध्या वेगळीं दवरल्यांत.
देशांत सक्रीय कोरोना दुयेंतींचो आंकडो 257 चेर पावलां. केरळांत सगळ्यांत चड 95 कोविड पॉझिटिव्ह दुयेंती आसात. तमिळनाडूंत 66, महाराष्ट्रांत 56 आनी कर्नाटकांत 13 सक्रीय दुयेंती आसात.
भारतांत सध्या कोरोनाची व्हडलीशी ल्हार दिसना. भलायकी आनी कुटुंब कल्याण मंत्रालयाच्या म्हणण्या प्रमाण 1 जानेवारी ते 19 मे ह्या काळांत देशांत फकत 257 दुयेंती मेळ्ळ्यात.पूण सरकाराच्या म्हणण्या प्रमाण, भारतांतली कोविड-19 परिस्थिती अजूनय नियंत्रणांत आसा. शेजारच्या देशांनी कोरोना दुयेंती वाडत आशिल्ल्यान भारतीय भलायकी तज्ञांनी जतनाय घेवपाचो सल्लो दिलां.

भारतांत कोरोनाक लागून 5 लाखां परस चड लोकांक मरण
भलायकी आनी कुटुंब कल्याण मंत्रालयाच्या म्हणण्या प्रमाण, भारतांत कोरोनाक लागून पांच लाखां परस चड लोकांक मरण आयलां. भारतांत जानेवारी 2020 वर्सा कोरोनाचो पयलो दुयेंती मेळ्ळो. मार्च 2020 वर्सा देशभरांत लॉकडावन लागू केलें.
भारतांत कोरोनाची पयली ल्हार जानेवारी 2020 ते फेब्रुवारी 2021 मेरेन जाली. ह्या काळांत सुमार 1.08 कोटी कोरोना दुयेंतींची नोंद जाली. 17 सप्टेंबर 2020 दिसा एकाच दिसा सगळ्यांत चड 98 हजार दुयेंती मेळ्ळे. ह्या ल्हारांत 1.55 लाख लोकांक मरण आयलें. दर दिसा सरासरी 412 जाणांक मरण आयलें.
कोरोनाची दुसरी ल्हार मार्च 2021 ते मे 2021 मेरेन आशिल्ली. दुसरी ल्हार सगळ्यांत घातक आशिल्ली. ह्या ल्हारांत 1.69 लाख लोकांक मरण आयलें. दर दिसा सरासरी 2,769 लोकांक मरण आयलें.
कोरोनाचो तिसरो टप्पो डिसेंबर 2021 ते फेब्रुवारी 2022 मेरेन आशिल्लो. ओमाइक्रोन वेरिएंटाक लागून जानेवारी 2022 वर्सा कोरोनाचे दुयेंती नेटान वाडले. ओमिक्रॉन वेरिएंटाक लागून तिसरे ल्हारेक दुयेंतींची संख्या व्हड प्रमाणांत वाडली. पूण दुसरे ल्हारापरस ती उणी घातक आशिल्ली. ह्या ल्हारांत 10,465 लोकांक मरण आयलें. सुमार 50.05 लाख नवें दुयेंती मेळ्ळे.