भांगरभूंय | प्रतिनिधी
पणजीः गवंडाळी रेल्वे फ्लायओवराचेर काम करतना प्रवाशांक थाकाय दिवपा खातीर पर्यायी रस्तो सोदपाक सरकाराक अजून येस मेळूंक ना. फाल्यां सकाळीं रेल्वे फ्लायओव्हराचो बुन्यादी फातर थळावे आमदार राजेश फळदेसाय हांचें हस्तुकीं जातलो. रेल्वे क्रॉसिंग बंद करपा विशीं अजून निर्णय जावंक ना.
फाटल्या नोव्हेंबरांत फ्लायओव्हर कामाची निविदा जारी केल्ली. सेंट फ्रांसिस झेवियराच्या पवित्र शवदर्शन सुवाळ्याक लागून नोव्हेंबरांत व्हड प्रमाणांत काम सुरू जालें ना. आतां पावस सुरू जावपाचो आसलो तरी बेगोबेग काम सुरू करतले अशी म्हायती आमदार राजेश फळदेसाय हांणी दिली. गरज पडल्यारुच रस्तो येरादारी खातीर बंद करतले. येरादारी सुरु दवरुन शक्य तितलें काम करपाचें यत्न करतले. नियोजीत फ्लायओव्हराच्या कुशीकच्यान पर्यायी रस्तो करपाचो प्रस्ताव आसा. हाचे खातीर जमनीच्या धनया कडेन उलोवणी करतां अशें आमदार राजेश फळदेसाय हांणी सांगलें.
सध्या रेल्वे जंक्शना लागसारचो रस्तो बंद जावंक नासलो तरी गरज पडल्यार तो बंद करतले. हे खातीर अधिसुचोवणी जारी जातली अशी म्हायती गोंय साधनसुविधा विकास म्हामंडळाचे वेवस्थापकीय संचालक हरीश अडकोणकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
