भांगरभूंय | प्रतिनिधी
अडेज कोटींचें लुकसाण जाल्ल्याचो अदमास
म्हापशें : पर्वरींतल्या वीज उपकेंद्रा लागसार उजो लागून इथरनॅट एक्सप्रेस हे खाजगी कंपनीच्या आवारांतलें इथरनॅट केबल उज्यांत लासलें. हातूंत लाखांनी रुपयांचें लुकसाण जालां. हो घातपाताचो प्रकार आशिल्ल्याचो दुबाव कंपनीन उक्तायलां.
मंगळारा सकाळीं साडे आठ वरांचे सुमाराक ही घडणूक उजवाडाक आयली. हे घडणुकेची म्हायती मेळटकच पिळर्ण उजो पालोवपी दळाचे कर्मचारी थंय पावलें. पूण तो मेरेन इंटरनेट केबलांक लागिल्लो उजो पातळ्ळो. तशेंच घडणुकेच्या सुवातेर पार्क आशिल्ल्या जीए 03 एएच 0823 आनी जीए 03 एन 7146 ह्या क्रमांकाच्या दोन म्हाल येरादारी रिक्शाक उजो लागलो आनी दोनूय गाडयांचें लुकसाण जालें. इंटरनेट केबल जळिल्ल्यान कंपनींक व्हड लुकसाण जालें. सादारण अडेज कोटींचें लुकसाण जाल्ल्याचो अदमास आसा.
उजो पालोवपी दळाचे उप अधिकारी सनी फायदे हांच्या फुडारपणा खाला प्रदीप नायक, भावेश शिरोडकार, प्रल्हाद कोटकार, मनोज महाले आनी विदेश म्हापसेकार हांच्या पंगडान उजो पालयलो.
पर्वरी पुलीस उपनिरिक्षक सीताराम मळीक आनी हवालदार मदन तारी हांणी घडणुकेचो पंचनामो केलो. पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
