दिवचल वाठारांत व्हड पावस, रस्त्यांचेर उदक

भांगरभूंय | प्रतिनिधी

दिवचलः आयज गोंयांतल्या चडशा वाठारांनी पावस पडलो. मान्सून पूर्व पावसाक लागून दिवचल तालुक्यांत गोंदळ निर्माण जालो. गटारांची नितळसाण अजून पुराय जावंक नाशिल्ल्यान जायत्या सुवातींनी रस्त्यांचेर आनी बाजारांत उदक भरून लोकांची गैरसोय जाली. गटार आनी हेर सुवातींनी लोक उडयतात तो प्लास्टीक कोयर गटारांतल्यान भायर सरून रस्त्यार पावलो, जाका लागून सगळ्या सुवातींनी घाणयारो वास पातळ्ळो. पावसाच्या दिसांनी जावपी खरेदी आनी हेर खरेदी तशेंच लग्न सुवाळे चालू आशिल्ल्यान लोकांची व्हड गैरसोय जाली.

दिवचल बाजारांतलो मुखेल रस्तो, कदंब बस स्टँण्ड, मुस्लिम वाडो ह्या वाठारांत गटार नियोजन सारकें जावंक ना. तशेंच नितळसाणेचे काम अजून पुराय जावंक नाशिल्ल्यान रस्त्यार जायत्या सुवातींनी उदक भरून वाहन चालकांक त्रास जाले.
सांखळे वाठारांतय जायत्या सुवातींनी उदक तुंबलां. सांखळे पालिकेन कांय दिसां आदीं नितळसाण मोहीम सुरू केल्या, पूण ती अजून पुराय जावंक ना. पूण बेगीन गरजेच्या सुवातेर गरजेचे सगळे उपाय करतले अशी म्हायती नगराध्यक्ष सिद्धी प्रभु हिणें दिली.
फाटल्या वर्सा तीन फावटीं अशेंच परिस्थितींक लागून बाजारांत आनी हेर वाठारांनी हुंवार आयिल्लो. आनी लाखांनी रुपयांचें लुकसाण जाल्लें. ते खातीर अंदूं अशीं परिस्थिती जावचीं न्हय म्हूण सगल्या संबंदीत यंत्रणांनी बेगोबेग लक्ष दिवचें अशी मागणी लोकांनी केल्या.

मजगतीं, गोंयांत 26 मे मेरेन पावस चालूच उरतलो. हवामान खात्या कडल्यान आयज, फाल्यां ऑरेंज अलर्ट जारी केलां आनी उपरांत 26 मे मेरेन यलो अलर्ट जारी केलां.