खगोलशास्रज्ञ डॉ. जयंत नारळीकर अंतरले
भांगरभूंय | प्रतिनिधी
पुणे, खबरां संस्था ः भारतीय खगोलशास्रज्ञ आनी विज्ञान साहित्याच्या मळा वयलें एक दिग्गज व्यक्तिमत्त्व डॉ. जयंत विष्णु नारळीकर (86) संवसाराक अंतरले. तांच्या मरणाक लागून शास्त्रीय आनी साहित्य जगांत व्हडली पोकळी निर्माण जाल्या. भारतीय विज्ञान मळारुय दुख्ख पातळ्ळां.
जयंत नारळीकर रसाळ भाशेंत मराठी विज्ञान कथा बरोवपा खातीर लोकप्रिय आशिल्ले. केंब्रिज विद्यापिठांतल्यान पदवी मेळयतकच ते भारतांत परतले. तांणी पयलीं टाटा इन्स्टिट्यूट ऑफ फंडामेंटल रिसर्चांत काम केलें. ते उपरांत आयुका इन्स्टिट्यूट स्थापन करपाक तांणी व्हड वांटो घेतलो. 2021 वर्सा नासिकांत जाल्ल्या अखील भारतीय साहित्य परिशदेचे ते अध्यक्ष आशिल्ले.
डॉ. नारळीकर हांचो जल्म 19 जुलय 1938 दिसा कोल्हापूरांत जालो. तांचे बाबा रँग्लर विष्णु वासुदेव नारळीकर नामनेचे गणित तज्ञ आनी बनारस हिंदू विद्यापिठाच्या वाराणसीच्या गणित विभागाचे मुखेली आशिल्लें. जाल्यार आवय सुमती ही संस्कृत विदुशी आशिल्ली. वाराणसींत शालेय शिक्षण पुराय जातकच जयंत हांणी विज्ञानाची पदवी मेळयली. उच्च शिक्षणा खातीर ब्रिटनांतल्या केंब्रिजांत वतकच तांणी बीए, एमए आनी पीएचडी पदवी मेळयली. हाचे भायर रँग्लर पदवी, खगोलशास्त्राचें टायसन पदक, स्मिथ पुरस्कार आनी हेर जायते पुरस्कार तांकां मेळ्ळ्यांत.
डॉ. जयंत नारळीकर हांची पुस्तकां
अंतराळातील भस्मासूर, अंतराळातील स्फोट, अभयारण्य, चला जाऊ अवकाश सफरीला, टाइम मशीनची किमया, प्रेषित, यक्षांची देणगी, याला जीवन ऐसे नाव, वामन परत न आला, व्हायरस, अंतराळ आनी विज्ञान, आकाशाशी जडले नाते, गणितातील गमतीजमती, नभात हसरे तारे (सहलेखक : डॉ. अजित केंभावी आनी डॉ. मंगला नारळीकर), नव्या सहस्रकाचे नवे विज्ञान, विश्वाची रचना, विज्ञान आनी वैज्ञानिक, विज्ञानगंगेची अवखळ वळणे, विज्ञानाची गरुडझेप, विज्ञानाचे रचयिते, सूर्याचा प्रकोप आनी चार नगरांतले माझे विश्व (आत्मचरित्र).
फावो जाल्ले पुरस्कार आनी सन्मान
1965 वर्सा तांकां पद्मभूषण पुरस्कार फावो जालो. 2004 वर्सा पद्मविभूषण पुरस्कार, 2010 वर्सा महाराष्ट्र भूषण पुरस्कार फावो जालो. तशेंच तांकां भटनागर पुरस्कार आनी एम.पी. बिर्ला पुरस्कार फावो जाल्यांत. डॉ. नारळीकर हांचें ‘चार नगरांतले माझे विश्व’ ह्या मराठी आत्मचरित्राक दिल्लीचे साहित्य अकादेमी कडल्यान 2014 वर्साचो पुरस्कार फावो जाला. ‘यक्षांची देणगी’ ह्या पुस्तकाक महाराष्ट्र सरकाराचो पुरस्कार मेळ्ळो. 2012 वर्सा अमेरिकन फावंडेशनान दिल्लो साहित्यविषयक जीवनगौरव पुरस्कार मेळ्ळो. फाय फावंडेशन, इचलकरंजी हांणी दिल्लो राष्ट्रभूषण पुरस्कार फावो जालो.
न्यूटनाचें आपोलांचें झाड
नारळीकर आयुकाचे संचालक आसतना तांणी न्यूटन बशिल्लो त्या आपोलाच्या झाडाच्यो तीन खांदयो पुण्यांत लायिल्ल्यो. तातूंतल्या एकाक आपोलूय जाल्लो. उपरांत चड तापमानाक लागून तीं झाडां मेलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
