शेट्टी खून प्रकरणांतल्या आरोपीचेर मंगळुरांत हल्लो
भांगरभूंय | प्रतिनिधी
मंगळूरु : हांगाचे बंदखणींत सोमारा सांजवेळार हिंदुत्व कार्यकर्तो सुहास शेट्टीच्या खून प्रकरणांतल्या एका आरोपीचेर तांच्या वांगड्यांनी बंदखणींत हल्लो करपाचो यत्न केल्ल्यान तणाव वाडला.
शेट्टीच्या 1 मे दिसा जाल्ल्या खुन प्रकरणांत इकरा जाणांक अटक जाल्ली. तातूंत नौशाद हाची मुखेल भुमिका आसा, असो आरोप आसा. ताका छोटे नौशाद अशेंय म्हण्टात. पुलिसांनी दिल्ले म्हायती प्रमाण ताणें मुखेल आरोपींक खून करपाक आदार केल्लो.
19 मे दिसा न्यायालयांत हाजीर जाले उपरांत नौशादाक म्हैसूरू बंदखणींत व्हरचे पयलीं आनीक एका कैद्याक मेळपाक व्हरतना हो हल्लो जालो. कांय कैद्यांनी ताचेर गुंडे आनी हेर वस्तू मारल्यो, अशें कळटा. बंदखणीच्या कर्मचाऱ्यांनी बेगीन हस्तक्षेप करून परिस्थिती नियंत्रणांत हाडली. नौशाद कसलीच दुखापत जावंक ना.
बजरंग दलचो आदलो वांगडी आनी 2022 वर्सा फाझील खून प्रकरणांतलो मुखेल आरोपी सुहास शेट्टी हाका 1 मे दिसा किन्नीपडवू लागसार हल्लेखोरांच्या पंगडान मारिल्लो. ह्या प्रकरणांत आतां मेरेन इकरा जाणांक अटक केल्या.
पुलिसांनी दिल्ले म्हायती प्रमाण तरसादी आनी धारदार शस्त्रां घेवन पांच ते स जाणांनी शेट्टीचे गाडयेक आडावन ताचेर हल्लो केल्लो. जखमी शेट्टीक मागीर हाॅस्पिटलांत मरण आयिल्लें.
42 वर्सां पिरायेचो शेट्टी कर्नाटकाच्या दर्यादेगे वयल्या राजकी मळा वयलो एक नामनेचो ‘वावुरपी’ आशिल्लो, ताचो बजरंग दल सारक्या हिंदुत्व संघटनां कडेन बरोच तेंप संबंद आशिल्लो. ताचेर पांच गुन्यांवकारी केशी आशिल्ल्यो. 23 वर्सां पिरायेच्या मोहम्मद फाझीलाच्या खून प्रकरणांत ताचें नांव 2022 वर्सा देश पांवड्याचेर गाजिल्लें. ह्या प्रकरणां उपरांत ह्या वाठारांत धर्मीक तणाव वाडिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
