भांगरभूंय | प्रतिनिधी
सल्लागारांच्या शिफारशी प्रमाण कामां सुरू
पणजी: सल्लागारांनी केल्ले शिफारशी प्रमाण कला अकादमीच्या नाट्यगृहांत गरजेचे ते बदल करपाक सुरवात केल्या. जुलय आनी ऑगस्ट ह्या दोन म्हयन्यांत ही सगलीं कामां जातलीं. ताका लागून ह्या काळांत नाट्यगृह प्रयोगां खातीर बंद दवरपाचो विचार सुरू आसा अशी म्हायती भौशीक बांदकाम खात्याचे (पीडब्ल्यूडी) मुखेल अभियंते वल्लभ पै हांणी सोमारा ‘भांगरभूंय’ कडेन उलयतना दिली.
कला अकादमींतल्या नाट्यगृहा विशीं ‘पीडब्ल्यूडी’न नेमणूक केल्ल्या तीन सल्लागारांचे शिफारशी प्रमाण गरजेचे ते बदल करपाच्यो सुचोवण्यो मुख्यमंत्री डॉ. प्रमोद सावंत हांणी केले उपरांत खात्यान हीं कामां सुरू केल्यांत. सल्लागारांनी ज्यो शिफारशी केल्यात तातूंत पयलींच्या कंत्राटदारान केल्ल्या कामांचो आस्पाव आसल्यार तीं कामां तांचे कडल्यान फुकट करून दिवपाचे निदेश मुख्यमंत्र्यांनी दिल्यात. ताका लागून ‘पीडब्ल्यूडी’न पयलींच्या मुंबयच्या टॅकटॉन ह्या कंत्राटदार कंपनीन केल्लीं कामां आनी सल्लागारांचे शिफारशी विशीं वळेरी तयार करपाक सुरवात केल्या अशें पै हांणी सांगलें.
वळेरी तयार जाले उपरांत टॅकटॉन कंपनी कडल्यान ज्या कामां विशीं चुको जाल्यात तीं कामां तांचे कडल्यान फुकट करून घेतले आनी उपरांत हे कंपनीक काळे वळेरेंत उडयतले अशें तांणी सांगलें.
नुतनीकरण केल्ल्या कला अकादमीच्या वास्तूंत ज्यो त्रुटी उरल्यात त्यो पयस करपाचो यत्न ‘पीडब्ल्यूडी’ कडल्यान सुरू आसा. आतां सल्लागारांच्या शिफारशी प्रमाण नाट्यगृहाचेर लक्ष केंद्रीत केलां. फुडले तीन ते चार म्हयने नाट्यगृहांत गरजेचे ते बदल करतले. ताका लागून जुलय आनी ऑगस्ट ह्या दोन म्हयन्यांत नाट्यगृह प्रयोगां खातीर बंद दवरपाचो विचार सुरू आशिल्ल्याचेंय पै हांणी सांगलें.
कला अकादमीच्या उक्त्या सभागृहाचें कामूय फुडल्या कांय म्हयन्यां भितर सुरू करतले. नव्यान उबारतल्या सभागृहाच्या पाख्याची मांडणी अत्याधुनीक पद्दतीन करपाचो विचार सुरू आसा. ते खातीर रोखडीच निविदा जारी करतले अशें वल्लभ पै हांणी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
