भांगरभूंय | प्रतिनिधी
नवी दिल्ली, खबरां संस्था ः उणो ऊस, हंगाम सुरू जावपाक कळाव जाल्ल्यान आनी साकर निर्यात उणी जाल्ल्यान देशांत साकर उत्पादन 18 टक्क्यांनी देंवलें. 15 मेच्या निमाणे कडेन देशांतलें वट्ट साकर उत्पादन 257.40 लाख टन जालां, जाल्यार फाटल्या वर्सा 315.40 लाख टन आशिल्लें. म्हणल्यार साकर उत्पादनांत 58 लाख टन उणाव जाला.
राष्ट्रीय सहकारी साकर कारखानो महासंघान जाहीर केल्ल्या आंकडेवारी प्रमाण, देशांतलें वट्ट साकर उत्पादन 15 मे मेरेन 18 टक्क्यांनी उणें जालां. 2023-24 वर्सा 315.40 लाख टन साकर उत्पादनाचे तुळेंत चालू हंगामांत साकराचें उत्पादन 58 लाख टन उणें जावन 257.40 लाख टन जालां.
ह्या हंगामाच्या निमाणे मेरेन देशांतलें साकर उत्पादन 261.10 लाख टन जातले असो अदमास आसा. निर्यात, घरगुती वापर आनी इथेनॉल खातीर वळयल्ली साकर सोडल्यार 48 ते 50 लाख टन साकर उरतली असो अदमास आसा. देखून साकरेचो उणाव येवचो ना अशें राष्ट्रीय सहकारी साकर कारखानो महासंघाचे अध्यक्ष हर्षवर्धन पाटील हांणी सांगलें.
देशांत ऊस काडप अंदूं 2767.75 लाख टन मेरेन देंवलां. फाटल्या वर्सा 3122.61 लाख टन काडप आशिल्लें. फाटल्या वर्साच्या तुळेंत ही 354.86 लाख टन उणी जाल्या. महाराष्ट्रांतलें उत्पादन अंदूं 80.95 लाख टन साकर जाला, जाल्यार फाटल्या वर्सा तें 110.20 लाख टन आशिल्लें अशी म्हायती राष्ट्रीय सहकारी साकर कारखानो महासंघाचे कार्यकारी संचालक प्रकाश नायक नवरे हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
